Navigaziun principala

Cuntegn da la pagina

Il salvament d'ansiels-chavriel cun dronas è stà in success

  • Erste Mitteilung
  • Neuen Beitrag einfügen

La primavaira passada èn vegnidas duvradas per la segunda giada dronas cun cameras termicas sin grondas surfatschas per salvar ansiels-chavriel. Cun il grond engaschament da las chatschadras e dals chatschaders grischuns sco er da las puras e dals purs han ins uschia pudì chattar 330 chavrielins novnaschids ed als salvar d'ina eventuala mort tras la maschina da segar. Da la fin da matg fin il cumenzament da fanadur han gì lieu 1121 sgols.

Cun 330 ansiels-chavriel salvads è il dumber in pau pli bass che l'onn precedent (448 ansiels-chavriel). Ins po dentant dir che la stagiun da salvament d'ansiels-chavriel è puspè stada in success, cun la participaziun da bleras pilotas e blers pilots da dronas motivads. Grazia als success dals ultims dus onns èsi ussa previs d'extender quest project l'onn 2021 sin ulteriuras regiuns e da cumprar correspundentamain ulteriuras dronas.

Ulteriura extensiun suenter duas stagiuns da success
Per l'onn 2021 duain vegnir vitiers tschintg ulteriuras dronas che duain vegnir messas da disposiziun a secziuns da chatschadras e chatschaders interessadas. Il basegn da las singulas secziuns da chatschadras e chatschaders vegn actualmain sclerì. Gia ussa utilisescha l'Uffizi da chatscha e pestga 19 dronas ch'èn repartidas sin las regiuns Partenz-Signuradi, Tschintg Vitgs, Surselva sut, Mantogna-Tumleastga, Schons, Stussavgia, Vaz-Casti, Engiadina bassa, Val Müstair. Responsablas per questas dronas èn tut en tut 23 secziuns da l'Uniun grischuna da chatschaders da patenta (UGCP).

Grond engaschament da las chatschadras e dals chatschaders malgrà COVID‑19
Cun grond engaschament han las 150 pilotas e pilots da dronas scolads fatg passa 1220 sgols, mintgamai baud la damaun u tard la saira. Las pilotas ed ils pilots da dronas e lur gidantras e gidanters vegnan recrutads per gronda part da las secziuns da las regiuns pertutgadas. Tut tenor la regiun vegnan las intervenziuns coordinadas da las secziuns, da la surveglianza da chatscha cumpetenta sco er da las puras e dals purs pertutgads, ubain che las secziuns procedan en atgna reschia. Aposta per quest intent han las chatschadras ed ils chatschaders endrizzà in servetsch da pichet. Senza la prontezza da las chatschadras e dals chatschaders e senza la collavuraziun cun las puras ed ils purs na pudess il project betg vegnir realisà.

Pervia da la situaziun da COVID‑19 han stuì vegnir annullads tut ils curs da scolaziun per novas pilotas e novs pilots da dronas. La primavaira proxima duain puspè vegnir purschids ulteriurs curs da scolaziun, per uschia gudagnar novas pilotas e novs pilots che s'engaschan per il bainstar dals ansiels-chavriel. Daventar pilota u pilot po da princip mintga persuna che ha in flair per sgular dronas ed in interess serius da salvar ansiels-chavriel.

Fotografia agiuntada:

gerettetes Rehkitz liegt im gemähten Gras

Infurmaziuns:
- Regula Bollier, Uffizi da chatscha e pestga dal Grischun, tel. +41 81 257 21 66, e‑mail Regula.Bollier@ajf.gr.ch
- Hansruedi Andreoli, president da la tgira da la selvaschina da la UGCP, tel. +41 77 535 45 52, e‑mail hr.andreoli@bluewin.ch


Gremi: Uffizi da chatscha e pestga
Funtauna: rg Uffizi da chatscha e pestga

Neuer Artikel