Navigaziun principala

Cuntegn da la pagina

Communicaziun da la Regenza dals 14 da settember 2020

  • Erste Mitteilung
  • Neuen Beitrag einfügen
La Regenza è s'exprimida davart il sboz da la nova Lescha federala davart vias da velos. Ultra da quai ha ella dà glisch verda per introducir in nov studi a la Scola auta spezialisada dal Grischun, surdà l'incarica da far in'analisa da l'egualitad da las pajas ed approvà in project per renovar il tunnel Carreratobel.

La Regenza beneventa il sboz da la nova Lescha federala davart vias da velos

La Regenza ha prendì posiziun tar in project da consultaziun dal Departament federal per ambient, traffic, energia e communicaziun che cuntegna il sboz d'ina nova Lescha federala davart vias da velos. Ella suonda la posiziun da la Conferenza svizra dals directurs da construcziun, da planisaziun e da protecziun da l'ambient (CCPA). Quella è dal medem avis sco la Confederaziun, numnadamain che vias da velos coerentas, segiras, directas ed attractivas sajan ina premissa impurtanta per promover vinavant il potenzial dal traffic da velos.
La Regenza ha ultra da quai approvà gia il fanadur 2019 il Plan sectorial chantunal Velo. In element da quest plan sectorial è tranter auter in plan da la rait da vias da velos che preschenta las colliaziuns e las rutas da la rait chantunala da vias da velos. El resguarda plinavant prescripziuns impurtantas ch'èn medemamain cuntegnidas en il sboz da la Lescha federala davart vias da velos. Latiers tutga tranter auter la differenziaziun da raits da vias da velos per il mintgadi e da raits per il temp liber.

Consultaziuns dal Departament federal per ambient, traffic, energia e communicaziun

La Regenza ha prendì posiziun tar in project da consultaziun dal Departament federal per ambient, traffic, energia e communicaziun che cuntegna il sboz d'ina nova Lescha federala davart vias da velos.

Nov studi "Bachelor of Science FHGR in Digital Business Management" a la Scola auta spezialisada dal Grischun

A partir dal cumenzament da l'onn da studi 2021/22 po la Scola auta spezialisada dal Grischun (SASGR) porscher il studi "Bachelor of Science FHGR in Digital Business Management". I sa tracta d'ina purschida da studi gia existenta che ha fitg grond success e che vegniva offrida fin ussa en furma d'ina direcziun d'approfundaziun en il "Bachelor of Science FHGR in Information Science". Per consolidar l'argument da vendita exclusiv sin il martgà svizzer da scolas autas duai questa direcziun d'approfundaziun vegnir transferida en in studi autonom. Quest nov studi ha la finamira da scolar persunas spezialisadas per l'economia digitala dal Grischun e da la Svizra. Manageras e managers da digital business ageschan al punct da contact tranter tecnologia d'infurmaziun, experientschas d'utilisadras ed utilisaders sco er innovaziun digitala. Ellas ed els èn responsabels per la concepziun, per la direcziun e per la cussegliaziun da projects digitals.

Drei DBM-Studierende im Vordergrund vor Laptop, zwei Studierende im Hintergrund am Flipchart-Board

© Scola auta spezialisada dal Grischun SASGR

A partir dal cumenzament da l'onn da studi 2021/22 po la Scola auta spezialisada dal Grischun (SASGR) porscher il studi "Bachelor of Science FHGR in Digital Business Management".

Analisa da l'egualitad da las pajas tar l'administraziun chantunala e tar ulteriuras organisaziuns dal sectur public

La Regenza ha incumbensà l'Uffizi da persunal da far in'analisa da l'egualitad da las pajas per l'administraziun chantunala, per l'Institut d'assicuranza sociala dal chantun Grischun sco er per l'Assicuranza d'edifizis dal Grischun. L'analisa – che sto vegnir terminada fin il pli tard la fin da zercladur 2021 – vegn fatga cun agid dal program d'analisa Logib che vegn mess a disposiziun da la Confederaziun. Silsuenter vegnan ils resultats verifitgads tras terzas persunas independentas, avant ch'els vegnan lura publitgads.
Tenor la Lescha federala davart l'egualitad da dunna ed um han interpresas, instituts da dretg public, dretgiras ed autoritads da mediaziun cun 100 emploiadas ed emploiads u dapli l'obligaziun da far ina tala analisa. Quella ha l'intent da cuntanscher ina meglra execuziun da l'egualitad da las pajas. Er las vischnancas e las vischnancas burgaisas, lur instituziuns purtadras excorporadas sco er las regiuns èn – tenor las prescripziuns dal dretg federal – obligadas d'analisar l'egualitad da las pajas, sch'ellas occupan 100collavuraturas e collavuraturs u dapli. La Regenza ha regurdà ellas a lur obligaziun ed ha surlaschà ad ellas da reglar sezzas ed autonomamain la realisaziun, la verificaziun sco er la publicaziun da l'analisa.

La Regenza ha incumbensà l'Uffizi da persunal da far in'analisa da l'egualitad da las pajas per l'administraziun chantunala, per l'Institut d'assicuranza sociala dal chantun Grischun sco er per l'Assicuranza d'edifizis dal Grischun.

Il tunnel Carreratobel po vegnir renovà e schlargià

Il project per schlargiar il tunnel Carreratobel sin la via sursilvana da la vart dretga dal Rain, che maina da Panaduz a Glion, è vegnì approvà. Cun il project duain vegnir cuntanschidas meglieraziuns da la tecnica da traffic. Quai èn tranter auter l'extensiun a 5,8 meters confurm a las normas, la garanzia da la segirezza stradala (en spezial la distanza da vista), in trassé cler e survesaivel, l'accumplientscha da segirezzas structuralas che correspundan a las normas sco er la pussaivladad da garantir ils mantegniments futurs senza impediments da traffic gravants. Tut en tut custa il project 1,87 milliuns francs.

Durchsicht Tunnel Carreratobel Tunnel Carreratobel von fern

Il project per schlargiar il tunnel Carreratobel sin la via sursilvana da la vart dretga dal Rain, che maina da Panaduz a Glion, è vegnì approvà.

Neuer Artikel
Gremi: Regenza
Funtauna: rg Chanzlia chantunala dal Grischun