Occurrenzas grondas dastgan puspè avair lieu a partir dal 1. d'october 2020, sch'ellas han ina permissiun dal chantun. Mintga occurrenza cun dapli che 1000 persunas sto preschentar in concept da protecziun. En quest connex ston vegnir observadas prescripziuns severas. Il chantun ha fixà las premissas da permissiun ed è ha manà discussiuns cun organisaturs d'occurrenzas grondas. Ultra da quai vegn intensivà il barat tranter il chantun e las federaziuns economicas.
Il scumond d'occurrenzas grondas tutga tar las mesiras centralas per proteger la populaziun cunter il nov coronavirus. Pervia da la situaziun epidemiologica en il chantun dastgan puspè avair lieu a partir dal 1. d'october 2020 occurrenzas grondas cun passa 1000 visitadras e visitaders u cun passa 1000 cooperaturas e cooperaturs. Uschia per exempel concerts, represchentaziuns da teater, congress, occurrenzas da sport ed autras occurrenzas dadens e dadora. Mintga occurrenza cun passa 1000 persunas sto preschentar in concept da protecziun cunter COVID-19 e sto vegnir permessa dal chantun.
Il chantun ha fixà las premissas per permetter occurrenzas grondas ed è sa scuntrà cun organisaturs d'occurrenzas grondas per discutar davart pussaivladads, prescripziuns e process. Uschia stgaffescha il chantun la basa per puspè pudair permetter occurrenzas grondas resguardond la situaziun epidemiologica. Sche la situaziun epidemiologica sa pegiurescha u sch'in organisatur da pliras occurrenzas sumegliantas n'ha betg observà las mesiras previsas en il concept da protecziun a chaschun d'ina occurrenza realisada e na po betg garantir che las mesiras vegnian observadas en il futur, po il chantun revocar ina permissiun concedida u decretar ulteriuras restricziuns.
Dumondas emplenidas cumplettamain ston vegnir inoltradas almain 20 dis avant l'occurrenza gronda a l'Uffizi da sanadad dal Grischun.
La partiziun COVID tira ina bilantscha positiva
Dapi mez settember sa chatta la nova partiziun COVID al nov lieu. Uschia ha l'infrastructura dal Center d'instrucziun da protecziun civila, ch'è vegnida duvrada fin ussa, puspè pudì vegnir surlaschada a l'Uffizi a militar e da protecziun civila. Tar la partiziun COVID lavuran circa 16 persunas spezialisadas dals secturs organisaziun, sanadad, dretg e communicaziun. Per la partiziun COVID tira l'Uffizi da sanadad ina bilantscha intermediara positiva en quai che concerna il dumogn da l'epidemia COVID-19. Ils contact tracers lavuran – tut tenor basegn – da glindesdi fin sonda. La planisaziun è organisada uschia che las resursas pon vegnir adattadas svelt a la situaziun epidemiologica e stattan a disposiziun – sche necessari – er la dumengia. Las infurmaziuns da contact actualas da la partiziun COVID sa chattan sin la pagina d'internet da corona dal chantun.
Intensivà il barat tranter il chantun e las federaziuns economicas
En vista a la stagiun d'enviern vegninta sa scuntran regularmain represchentantas e represchentants da las federaziuns economicas grischunas, da l'Uffizi chantunal da sanadad sco er dal Departament d'economia publica e fatgs socials per in barat. En il focus dals discurs stat il barat d'infurmaziuns sco er la planisaziun dal manaschi d'enviern en temps da corona. En vista a l'impurtanza economica dal turissem d'enviern per il Grischun vegn intensivà il barat tranter las federaziuns da las branschas economia, turissem, hotellaria, gastronomia e fatgs da construcziun sco er l'Uffizi da sanadad. Tegnair distanza e lavar ils mauns èn anc adina las mesiras las pli efficazias cunter la derasaziun dal virus e valan vinavant senza restricziuns.
Per il mument po la situaziun en il Grischun vegnir designada sco stabila. En il Grischun sa chattan actualmain 20 persunas en isolaziun, var 56 persunas en quarantina, e 3 persunas vegnan tgiradas en in ospital.
Infurmaziuns:
Marina Jamnicki, media chantunala, Uffizi da sanadad dal Grischun, tel. +41 81 257 26 46, e-mail Marina.Jamnicki@san.gr.ch
Gremi: Uffizi da sanadad
Funtauna: rg Uffizi da sanadad