Navigation

Inhaltsbereich

  • Erste Mitteilung
  • Neuen Beitrag einfügen

En ina giada sa chattan da nov var 19 000 fotografias d'impurtants fotografs grischuns e bain la pli gronda collecziun grischuna da nodas-chasa online sin la pagina d'internet ed en il sistem d'infurmaziun da l'Archiv dal stadi dal Grischun. Ellas stattan a disposiziun qua gratuitamain. Uschia pon ins visitar l'archiv er davent da chasa.

Il principi dal 20. tschientaner ha l'Inspecturat forestal chantunal, oz l'Uffizi da guaud e privels da la natira, cumenzà a fixar la lavur en il guaud er sin fotografias: sco documentaziun, sco material da mussament, sco basa per planisaziuns e per intents da scolaziun. Ina da las collecziuns ch'è resultada da quai, po ussa vegnir consultada online grazia a fotografias da prevista. Reproducziuns d'auta qualitad pon vegnir empustadas tar l'Archiv dal stadi.

Foto Feuerstein, Scuol, ed Atelier Lienhard & Salzborn, Cuira
L'Archiv dal stadi tegna er en salv relaschs da fotografs privats, sch'els èn impurtants per l'istorgia dal chantun Grischun. Davart l'inventari da la dinastia da fotografs Feuerstein da Scuol (1900–1955) e da l'Atelier da fotografar Lienhard & Salzborn (1889–1963), Cuira e San Murezzan na pon betg vegnir purschids da nov mo registers voluminus, mabain er fotografias da prevista da buna qualitad. Las fotografias documenteschan cuntradas e natira, maletgs da lieus e d'edifizis, il turissem, festas e festivitads sco er per part la lavur e la vita da mintgadi.

Simbols misterius svelt decifrads: la cartoteca da nodas-chasa
Tar la nova versiun da l'inventari tutga er bain la pli gronda cartoteca da nodas-chasa dal Grischun. Questa cartoteca stat da nov a disposiziun online. Nodas-chasa datti sin bleras chasas dal Grischun, sin mobiglia e sin iseglia. Ellas inditgeschan a tge famiglia respectivamain a tge persuna che tala appartegneva. Tut en tut cumpiglia la cartoteca 10 000 nodas.

L'Archiv dal stadi dal Grischun che fa part da l'Uffizi da cultura, fa regularmain attent als inventaris che vegnan dads liber da nov per l'utilisaziun, suenter ch'els èn vegnids elavurads per il diever d'archiv e suenter ch'els han survegnì in register. Ensemen cun ils effectivs da fotografias menziunads e cun las nodas-chasa èn quai questa giada ils inventaris da l'Uffizi d'agricultura che permettan da studegiar detagliadamain las subvenziuns durant il 20. tschientaner, sco er ils inventaris da la Centrala per il provediment economic dal pajais che ha giugà ina rolla impurtanta durant la segunda guerra mundiala. Ils registers da quests inventaris stattan bain a disposiziun online, ma ils inventaris sco tals pon anc adina mo vegnir utilisads al lieu, en la sala da lectura.

In sustegn vegn dà
Mintgatant n'èsi betg simpel da s'orientar en la diversitad da las pussaivladads digitalas e da lavurar cun ils bains da l'archiv. L'Archiv dal stadi dat gugent in sustegn al lieu e respunda dumondas da perscrutadras e perscrutaders interessads e da tals che vulan daventar perscrutaders (contact: e-mail info@sag.gr.ch, tel +41 81 257 28 03).

Neuer Artikel

Fotografias agiuntadas:

Infurmaziuns:

- Reto Weiss, archivari dal stadi, tel. +41 81 257 28 03, e‑mail Reto.Weiss@sag.gr.ch
- Sandro Decurtins, substitut da l'archivari dal stadi, tel. +41 81 257 28 02, e‑mail Sandro.Decurtins@sag.gr.ch


Gremi: Departament d'educaziun, cultura e protecziun da l'ambient
Funtauna: rg Uffizi da cultura