Navigaziun principala

Cuntegn da la pagina

La Regenza n'ha betg dà suatientscha ad in recurs da surveglianza d'ina interpresa da construcziun

  • Erste Mitteilung
  • Neuen Beitrag einfügen

La Regenza n'ha betg dà suatientscha ad in recurs da surveglianza d'ina interpresa da construcziun ch'è involvida en las proceduras da la CUMCO cunter il Departament d'infrastructura, energia e mobilitad (DIEM). L'interpresa da construcziun aveva reclamà d'esser vegnida sfurzada da far ina cunvegna d'enclegientscha per rectifitgar las pretensiuns d'acquisiziun e da dretg civil dal chantun e d'esser vegnida exclusa nungiustifitgadamain – per mancanza d'ina cunvegna d'enclegientscha – da las futuras surdadas da las lavurs tras il chantun.

Sco donnegià principal dal cartel da construcziun da vias, ch'è vegnì constatà da la CUMCO, è il chantun Grischun entrà en tractativas d'enclegientscha cun las interpresas da cuvridas da vias involvidas. Il motiv per cumenzar cun discurs d'enclegientscha è stà l'appel dal secretariat da la CUMCO a las interpresas da rectifitgar cun il chantun las relaziuns d'acquisiziun e da dretg civil, las qualas eran resultadas da las cunvegnas da construcziun che avevan probablamain violà il dretg da concurrenza. La CUMCO ha rendì attent al fatg ch'ina tala cunvegna cun la victima pudess avair per consequenza che la multa dal delinquent vegniss mitigiada. La Regenza ha beneventà l'iniziativa da la CUMCO ed ha incumbensà il DIEM da far – ensemen cun il Departament da finanzas e vischnancas (DFV) – discurs d'enclegientscha.

Cunvegnas d'enclegientscha cun success
Il chantun ha pudì far cunvegnas d'enclegientscha cun 15 interpresas. Uschia han pudì vegnir impedidas charas proceduras da blers onns e tuttina vegnir gulivads ils donns ch'eran resultads. A medem temp han pudì vegnir stgaffidas las premissas per che la concurrenza en connex cun las acquisiziuns da prestaziuns da construcziun funcziunia er en l'avegnir.

Proceder envers la KIBAG Bauleistungen SA
Quella interpresa, cun la quala i n'è betg stà pussaivel da rectifitgar ils donns, è vegnida exclusa per ina durada limitada da futuras surdadas da las lavurs tras il chantun, e quai sa basond sin il dretg d'acquisiziuns chantunal. Cunter questa exclusiun ha l'interpresa fatg recurs tar la Dretgira administrativa. La procedura è pendenta. A medem temp ha ella inoltrà in recurs da surveglianza a la Regenza. Sco motivaziun ha ella fatg valair d'esser vegnida sfurzada dal DIEM da far ina cunvegna d'enclegientscha e d'esser vegnida exclusa nungiustifitgadamain da las futuras surdadas da las lavurs tras il chantun.

La Regenza n'ha betg dà suatientscha al recurs da surveglianza da l'interpresa da construcziun
La Regenza è arrivada a la conclusiun che l'incumbensa legala saja vegnida ademplida e ch'ils pass giuridics ch'eran necessaris tenor la legislaziun chantunala e federala, sajan vegnids fatgs. Las violaziuns dal dretg che la recurrenta pretenda, haja quella gia deposità u avess pudì depositar tar las instanzas ordinarias cumpetentas. Las decisiuns èn anc pendentas. Il med giuridic dal recurs da surveglianza avess mo in effect, sche la violaziun dal dretg che vegn crititgada, na pudess betg vegnir contestada cun in med legal ordinari u extraordinari (subsidiaritad). Perquai che la KIBAG Bauleistungen SA n'ha betg pudì cumprovar quest fatg ed er betg ina violaziun dal dretg material u dal dretg processual ch'è relevanta tenor il dretg da surveglianza, e perquai ch'ella n'ha betg resguardà interess publics impurtants sco er perquai che quests fatgs n'èn er betg evidents, na stoi betg vegnir dà suatientscha al recurs da surveglianza.

Persuna che dat infurmaziuns pervia da la recusaziun dal president da la Regenza Christian Rathgeb e dal cusseglier guvernativ Mario Cavigelli:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch


Gremi: Departament da giustia, segirezza e sanadad
Funtauna: rg Departament da giustia, segirezza e sanadad

Neuer Artikel