Navigaziun principala

Cuntegn da la pagina

Plan pretensius per la chatscha speziala 2020

  • Erste Mitteilung
  • Neuen Beitrag einfügen

Schebain che la preda da chatscha auta è stada fitg buna, vali da realisar in plan pretensius per la chatscha speziala 2020. Senza la chatscha da november e da december na fissi betg pussaivel da regular las populaziuns da tschiervs e da chavriels.

Il plan da prelevaziun dals tschiervs cun tut en tut 5560 tschiervs è tuttina aut sco quel da l'onn precedent. En tut las regiuns cun gronds conflicts tranter il guaud e la selvaschina è la quota d'animals feminins, che sto vegnir sajettada tenor il plan da prelevaziun, vegnida augmentada da 50 sin 55 respectivamain sin 60 pertschient. Il plan è ademplì, cur ch'i èn vegnids sajettads almain 3154 animals feminins (2019: 3116). Durant las trais emnas da la chatscha auta grischuna 2020 èn vegnids sajettads var 30 pertschient dapli tschiervs e chavriels che l'onn precedent. Ma per che l'incarica da la chatscha vegnia ademplida sto vegnir sajettà supplementarmain anc in dumber considerabel da tschiervs e da chavriels a la chatscha speziala 2020.

La preda da tschiervs e da chavriels 2020 en ina survista:

  Total 2019 masculin 2019 feminin 2019 relaziun tranter las schlattainas
 Tschiervs 4297 3309 2686 1868 1611 1441 1:0.6
 Chavriels 2489 1844 1567 1139 922 705 1:0.59
 Chamutschs 2921 2925 1429 1473 1492 1452 1:1.05
 Portgs selvadis 19 18 10 9 9 9  
 Selvaschina d'ungla 9729 8096          


Er la populaziun da chavriels sto vegnir regulada
La preda da bucs-chavriel ch'è stada cleramain pli gronda che quella da l'onn precedent, reflectescha ina populaziun da chavriels generalmain buna fin regiunalmain memia gronda. En las regiuns cun gronds conflicts tranter il guaud e la selvaschina èsi da partir dal fatg, ch'ils chavriels hajan ina influenza decisiva sin la regiuvinaziun dal guaud. En questas regiuns vegn per quest motiv organisada la chatscha speziala da chavriels independentamain da la preda da bucs-chavriel durant la chatscha auta.

Gronda quota d'animals masculins en la preda da chatscha auta
Perquai che cunzunt la quota da tschiervs masculins è stada auta en la preda da chatscha auta, sto vegnir intensivada la regulaziun da tschiervs feminins a la chatscha speziala 2020. Ultra a quai vegnan fixadas ulteriuras chatschas prioritaras en vischnancas spezialmain pertutgadas.

Per cuntanscher ina regulaziun suffizienta da la populaziun da tschiervs dovri las chatschas supplementaras durant il november ed il december. En tut las 21 regiuns da tschiervs vegnan organisadas chatschas spezialas da tschiervs. Per la chatscha speziala èn s'annunziads 3551 chatschadras e chatschaders (onn precedent: 3422). Questas chatschadras e quests chatschaders vegnan infurmads sco fin ussa sur il Fegl uffizial chantunal e sur la pagina d'internet da l'Uffizi da chatscha e pestga (UCP) davart il plan da prelevaziun, davart ils lieus e las uras per retrair la patenta, davart particularitads regiunalas e davart las uras d'avertura dals lieus d'examinaziun.

Situaziun speziala per s'annunziar per l'examen da chatscha
Pervia da la situaziun en connex cun COVID-19 pon s'annunziar tut las candidatas ed ils candidats per l'examen da qualificaziun per chatschadras e chatschaders 2021/2022 quest atun exclusivamain en scrit cun il formular d'annunzia uffizial che sto vegnir tramess per posta A plus. La publicaziun è stada gievgia, ils 15 d'october 2020 en il Fegl uffizial dal chantun Grischun e sin la pagina d'internet dal UCP. L'annunzia sto vegnir fatga fin il pli tard ils 13 da november 2020. Il formular d'annunzia po vegnir chargià giu da la pagina d'internet dal UCP. L'annunzia vala per tut las parts obligatoricas da l'examen e dals curs.

Agiuntas:
Plan da la chatscha d'atun sin tschiervs 2020
Plan da la chatscha d'atun sin chavriels 2020

Infurmaziuns:
dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e‑mail Adrian.Arquint@ajf.gr.ch (ercuntanschibel da las 11.00 fin las 12.00)


Gremi: Uffizi da chatscha e pestga
Funtauna: rg Uffizi da chatscha e pestga

Neuer Artikel