Navigaziun principala

Cuntegn da la pagina

Sessiun da december 2020 dal Cussegl grond

  • Erste Mitteilung
  • Neuen Beitrag einfügen

Pervia da la situaziun actuala da COVID‑19 vegn il Cussegl grond puspè a sa radunar ordaifer l'edifizi dal Cussegl grond ed ir al Center da congress a Tavau per sia sessiun da december 2020.

A chaschun da sia ultima sesida è la Conferenza da las presidentas e dals presidents dal Cussegl grond sa fatschentada detagliadamain cun la situaziun concernent la pandemia da COVID‑19 ed ha sondà en quest connex en spezial la libertad d'agir tenor lescha per manar tras la sessiun da december 2020. Dapi ils 29 d'october 2020 ston vegnir resguardadas in pèr particularitads per ils parlaments. Uschia na vala per exempel betg la limita superiura da 50 persunas per occurrenza. Ma l'obligaziun da purtar ina mascrina e – supplementarmain – las prescripziuns da distanza ston vegnir observadas en mintga cas er dals parlaments. Perquai che las distanzas minimalas na pon betg vegnir observadas en la sala dal Cussegl grond, n'è ina sessiun en l'edifizi dal Cussegl grond a Cuira actualmain betg pussaivla resp. pussaivla mo cun ina permissiun excepziunala.

Ina tala permissiun excepziunala da l'Uffizi chantunal da sanadad n'è però betg vegnida en dumonda per la maioritad da la Conferenza da las presidentas e dals presidents. Per l'ina vegn ina privilegisaziun dal Cussegl grond envers autras occurrenzas giuditgada sco betg adequata. Per l'autra stat la protecziun optimala da las commembras e dals commembers dal Cussegl grond ed uschia er da la populaziun dal Grischun en il center. Per quests motivs è la gronda maioritad da la Conferenza da las presidentas e dals presidents s'exprimida per ina sessiun "extra muros" en relaziuns da spazi pli generusas. Il Center da congress a Tavau porscha premissas idealas per quai.

Obligaziun da purtar ina mascrina, distanza e naginas aspectaturas ed aspectaturs – percunter livestream
Ultra dal purtar ina mascrina vegnan er las distanzas tranter las plazzas da lavur da las parlamentarias e dals parlamentaris a procurar per ina protecziun supplementara cunter ina infecziun. Pervia da las mesiras pli severas concernent la protecziun cunter COVID‑19 n'è però admess nagin public a Tavau. La populaziun interessada po dentant persequitar la sessiun sur in livestream. Per las collavuraturas ed ils collavuraturs da las medias vegnan messas a disposiziun plazzas avunda per ch'in rapport optimal or dal Cussegl grond saja garantì.

Infurmaziuns:
president dal Cussegl grond Martin Wieland, tel +41 79 799 61 15 (cuntanschibel per telefon a partir da las 11.00 )


Gremi: Chanzlia chantunala
Funtauna: rg Chanzlia chantunala

Neuer Artikel