L'Uffizi da guaud e privels da la natira ha elavurà ina nova strategia per il futur "Biodiversitad forestala en il Grischun 2035". Quella sa basa sin il Plan per il svilup dal guaud (PSG2018+) ch'è in instrument impurtant per las proprietarias ed ils proprietaris da guaud sco er per il chantun.

Il guaud cuvra in terz da la surfatscha dal chantun Grischun e porscha spazi da viver a nundumbraivlas spezias d'animals e da plantas. Circa 40 pertschient da tut las spezias en Svizra vivan en il guaud u dal guaud, per exempel la mesadad da tut las stgars 200 spezias d'utschels cuaders u schizunt tut las 30 spezias indigenas d'utschels-mezmieur. Sin basa dal Plan per il svilup dal guaud (PSG2018+) ha l'Uffizi da guaud e privels da la natira (UGP) elavurà la strategia "Biodiversitad forestala en il Grischun 2035" per mantegnair e per promover cun finamiras concretas la biodiversitad en il guaud durant in orizont da temp da var 15 onns. La strategia "Biodiversitad forestala en il Grischun 2035" remplazza il concept "Protecziun da la natira en il guaud" da l'onn 2000. Ils programs da promoziun actuals en il guaud per installar reservats da guaud sco er per mantegnair e per augmentar la valur dals spazis da viver e da las spezias vegnan cuntinuads ed extendids en tscherts puncts. Uschia duain vegnir mantegnidas e promovidas la biodiversitad sco er la qualitad dal guaud sco spazi da viver.

Daners da promoziun per augmentar la valur dals spazis da viver e dals reservats da guaud
La Confederaziun sustegna il mantegniment e la promoziun da la biodiversitad forestala ed ha fixà mesiras respectivas cun ils chantuns. En la cunvegna da program "Guaud" per ils onns 2020 fin 2024 è vegnida garantida al chantun Grischun ina contribuziun federala da circa 12,7 milliuns francs per la biodiversitad forestala. Quest import vegn cumplettà cun contribuziuns chantunalas e pajà a las proprietarias ed als proprietaris da guaud per realisar mesiras, sco augmentar la valur dals spazis da viver u installar reservats da guaud. Tenor la lescha ston las proprietarias ed ils proprietaris da guaud surpigliar sezs ina contribuziun d'almain 30 pertschient dals custs imputabels.

Plan per il svilup dal guaud sco basa
Per mantegnair e per promover la biodiversitad forestala èn vegnidas fixadas en il PSG2018+ quellas surfatschas, nua ch'i duain vegnir impundidas ils proxims var 15 onns sistematicamain contribuziuns da la Confederaziun e dal chantun. Cun la strategia "Biodiversitad forestala en il Grischun 2035" èn vegnidas elavuradas finamiras regiunalas sin basa dal potenzial identifitgà en il PSG2018+. Questas finamiras resguardan differents criteris, sco la qualitad dals spazis da viver u l'urgenza da las mesiras. Reservats da guaud vegnan installads mo là, nua ch'il potenzial è gia registrà en il Plan per il svilup dal guaud. Las mesiras da promoziun vegnan realisadas unicamain sin las surfatschas designadas, nua che l'urgenza per mesiras è gronda ed il potenzial per mantegnair u per augmentar la qualitad è grond.

Ils aspects multifars da la biodiversitad forestala èn resumads en ina furma simpla e chapaivla en la versiun repassada dal fegl d'infurmaziun 15 "Biodiversitad forestala" dal UGP.

Agiuntas:
- Al fegl d'infurmaziun
- A la strategia "Biodiversitad forestala en il Grischun 2030"

Fotografias agiuntadas:

Schembers ad Avras

Foto 2:Guauds da ruvers multifars a Maiavilla
Foto 3:Reservat da guaud natiral God da Tamangur en Val S-charl

Infurmaziuns:
- Urban Maissen, selvicultur chantunal UGP, tel. +41 81 257 38 61, e‑mail Urban.Maissen@awn.gr.ch
- Dr. Marco Vanoni, manader dal sectur Guaud da protecziun ed ecologia forestala UGP, tel. +41 81 257 38 57, e‑mail Marco.Vanoni@awn.gr.ch

Gremi: Uffizi da guaud e privels da la natira
Funtauna: Uffizi da guaud e privels da la natira