Navigation

Inhaltsbereich

  • Erste Mitteilung
  • Neuen Beitrag einfügen

Ensemen cun ils chantuns da la Svizra Orientala e cun partenaris etablids extenda il Grischun la promoziun da l'innovaziun per interpresas pitschnas e mesaunas (IPM). La Rait d'innovaziun da la Svizra Orientala (INOS) porscha a las firmas pussaivladads generalas ed unitaras per emprimas cussegliaziuns e per coachings. Actualmain prepara il chantun ensemen cun las organisaziuns da tetg da l'economia grischuna ina introducziun sistematica da quests servetschs.

Oravant tut per IPM senza in'atgna partiziun da svilup daventan las sfidas per sa far valair sin il martgà cun products novs adina pli grondas. Las forzas internas da la firma na bastan savens betg pli, perquai che las sfidas finanzialas, tecnicas e dal martgà daventan memia grondas. Tendenzialmain sa concentreschan las IPM pli e pli sin meglierar singuls puncts da lur andaments da producziun. Da quai resultan bain respargns a curta vista, ma in rinforz duraivel da la situaziun da concurrenza na vegn betg cuntanschì uschia.

Emprima cussegliaziun e coaching
Sco Rait INOS vulan ils chantuns da la Svizra Orientala far frunt a quest svilup ensemen cun partenaris etablids. Sur la collavuraziun cun coachs, cun expertas ed experts, cun instituts da perscrutaziun e cun federaziuns gida la rait las IPM da s'engaschar – ultra per novaziuns pli pitschnas – er per novaziuns fundamentalas. En il center stattan per entant l'emprima cussegliaziun individuala ed in coaching specific per l'interpresa. Per las IPM è l'access a las purschidas dad INOS simpel e svelt ed el funcziuna sur tut la rait tenor andaments unitars. Las IPM n'èn betg liadas a cunfins chantunals ed a purschidas chantunalas. Il motto dad INOS è perquai program: "Accelerar cuminaivlamain l'innovaziun".

Introducziun dals servetsch en il Grischun
Per che er IPM grischunas vegnian a savair dals servetschs dad INOS, vegn l'introducziun sin il martgà concretisada en stretga collavuraziun cun las organisaziuns da tetg da l'economia grischuna e planisada confurm als basegns da la gruppa en mira. Quai cuntegna la communicaziun sco er l'integraziun d'interlocuturs locals per las IPM en il Grischun. INOS duai gidar da rinforzar la forza innovativa da las IPM cun ina intermediaziun activa da savida che sa referescha a l'interpresa e da pussibilitar ina colliaziun a la promoziun naziunala da l'innovaziun. 

Interlocuturs regiunals
Ils posts da contact regiunals per l'economia giogan ina rolla impurtanta en l'emprim contact cun las IPM: Il Center da las IPM dal Grischun, il Center svizzer d'electronica e da microtecnologia CSEM a Landquart, il Svilup da l'economia Glaruna, il Center d'industria e da tecnologia ITS a Schaffusa, Startfeld a Son Gagl, RhySearch, il Forum da tecnologia turgovian e Zürioberland Wirtschaft porschan a mintga IPM cun potenzial innovativ in access sin mesira a las resursas ed al know-how da l'entira rait. Purschidas da promoziun supplementaras sco quella da la Nova politica regiunala e da l'Agentura federala per la promoziun da l'innovaziun, Innosuisse, vegnan resguardadas en cas da basegn.

Durada fin la fin da l'onn 2023
La rait vegn finanziada en il rom da la Nova politica regiunala da la Confederaziun (NPR) tras ils chantuns Grischun, Glaruna, Schaffusa, Appenzell Dador, Appenzell Dadens, Son Gagl e Turgovia sco er tras il chantun Turitg per la Part Sura Turitgaisa. La Confederaziun surpiglia la mesadad dals custs. Il program dura per entant fin la fin da l'onn 2023.

Ina survista da las purschidas dad INOS dat la pagina d'internet www.inos.swiss. Qua vegnan er inditgadas infurmaziuns concernent las proximas occurrenzas d'infurmaziun che han lieu ensemen cun ils partenaris da la rait – pervia da corona per grond part en moda virtuala.


Infurmaziuns:
Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch


Gremi: Departament d'economia publica e fatgs socials
Funtauna: rg Departament d'economia publica e fatgs socials

Neuer Artikel