Navigaziun principala

Cuntegn da la pagina

Regulaziun da la cumpetenza en cas da privels da la natira

  • Erste Mitteilung
  • Neuen Beitrag einfügen

En la sessiun da zercladur 2020 ha il Cussegl grond approvà la revisiun parziala da la Lescha chantunala davart il guaud (LCG). Questa revisiun parziala entra ussa en vigur il 1. da schaner 2021. Il punct central da la revisiun da la lescha è la regulaziun da las cumpetenzas tranter il chantun e las vischnancas en il sectur dals privels da la natira.

Cun la revisiun parziala da la LCG vegn reglà l'urden da cumpetenzas en l'uschenumnà management integral da las ristgas (MIR) en cas da privels da la natira. Tenor quel èn las vischnancas cumpetentas per la protecziun cunter privels da la natira, nun che la LCG e la legislaziun speziala declerian il chantun u terzas varts sco cumpetents per quai. Il chantun elavura las basas per giuditgar la periclitaziun e las ristgas potenzialas tras privels da la natira. El valitescha las ristgas e mussa las mesiras pussaivlas.

Reglà da nov vegn ultra da quai il champ d'applicaziun per scumonds da far fieu. En cas d'in privel d'incendi da guaud e da cultira pli grond èsi scumandà da far fieu ordaifer la zona d'abitadi. Las vischnancas pon disponer excepziuns dal scumond da far fieu per fuclars segirs ordaifer il guaud.

Pervia da la revisiun da la Lescha federala davart il guaud sto er la LCG vegnir cumplettada en quel senn che possessuras e possessurs da bostgs e d'autras plantas ston impedir e far bun donns vi dal guaud, sche lur bostgs e lur plantas èn u pudessan esser infectads d'organissems nuschaivels.

Revisiun parziala da l'Ordinaziun chantunala davart il guaud
Ultra da la revisiun da la lescha ha la Regenza plinavant revedì parzialmain l'Ordinaziun davart il guaud (OCG). La revisiun da la LCG sco er las midadas da dretg sin plaun federal han pretendì questa adattaziun. Tranter auter ha la Confederaziun definì en la Lescha federala davart il guaud la scolaziun minimala per lavurantas e lavurants da guaud senza emprendissadi. Grazia a questas adattaziuns è la OCG daventada bler pli concisa.

Nova Ordinaziun davart il management integral da las ristgas tar privels da la natira
Las disposiziuns executivas da la LCG revedida concernent il MIR vegnan regladas en la nova Ordinaziun davart il management integral da las ristgas tar privels da la natira (OMIR). Areguard il giudicament dals privels, il giudicament da las ristgas e la planisaziun da las mesiras s'orientescha la concepziun da l'ordinaziun vi dals pass dal management integral da las ristgas.

Durant la fasa da prevenziun surpiglia il chantun l'incumbensa da metter a disposiziun las basas concernent privels e ristgas, en spezial il cataster dals eveniments e da las ovras da protecziun sco er las chartas d'infurmaziun da privels e da ristgas. Ultra da quai pon las vischnancas dumandar ch'il chantun elavuria planisaziuns per cas d'urgenza e fetschia la scolaziun da cussegliadras localas e cussegliaders locals da privels da la natira. Integradas en la OMIR èn las directivas vertentas per la planisaziun da las zonas da privel, e quai cun disposiziuns actualisadas.


Infurmaziuns:
- cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Urban Maissen, selvicultur chantunal, Uffizi da guaud e privels da la natira, tel. +41 81 257 38 51, e-mail Urban.Maissen@awn.gr.ch


Gremi: Regenza
Funtauna: rg Regenza

Neuer Artikel