Navigaziun principala

Cuntegn da la pagina

Scleriments davart l'epidemia d'arments en il chantun Grischun

  • Erste Mitteilung
  • Neuen Beitrag einfügen

En la regiun Partenz/Tavau è vegnida cumprovada la rinotracheitis bovina infectusa (IBR) tar ina vatga. Ils manaschis che tegnan arments e ch'èn probablamain pertutgads èn vegnids serrads giu immediatamain. Per arments n'è la IBR betg curabla, per umans n'exista però nagin privel.

Tenor la Lescha davart epidemias d'animals è la IBR in'epidemia d'animals che sto vegnir extirpada e che vegn perquai cumbattida e survegliada cun agid d'in program fitg char. En connex cun analisas en cas d'in abort tar in arment hai dà il december 2020 il suspect ch'in arment en il chantun Grischun haja IBR. Quel è vegnì mazzà ed il manaschi correspundent è vegnì serrà giu. Actualmain vegnan fatgas ulteriuras analisas en il labor da referenza.
Per determinar ina derasaziun pussaivla da la malsogna vegni actualmain sclerì cun tge animals che l'animal pertutgà ha gì contact. Tut ils manaschis cun animals che han gì contact cun l'animal pertutgà vegnan serrads giu preventivamain.

Pervia dal viv commerzi da muvel en Svizra po in'epidemia d'animals sa derasar fitg svelt. Per sclerir exactamain ina derasaziun e per interrumper ulteriuras infecziuns dovri ina surveglianza cumpletta dal traffic d'animals e scleriments diagnostics correspundents da labor. En quest connex collavuran las autoritads chantunalas, l'Uffizi federal da segirezza alimentara e fatgs veterinars (USAV) ed il labor da referenza naziunal da la facultad Vetsuisse a Turitg stretgamain in cun l'auter ed infurmeschan davart il svilup current.

Dapi l'onn 1993 è la Svizra libra dad IBR
DLa IBR è sa mussada l'emprima giada massivamain en Svizra l'onn 1977 ed è vegnida cumbattida cun mesiras rigurusas. A partir da l'onn 1983 hai dà in program d'extincziun cun il resultat che la malsogna è stada extirpada definitivamain en Svizra suenter 10 onns e cun custs enorms da 135 milliuns francs. Per che quests sforzs na sajan betg stads invans, fan la Confederaziun ed ils chantuns tut per mantegnair il status "liber dad IBR".

La IBR n'è betg curabla. Sch'in animal è infectà, po l'agent patogen, in herpesvirus, sa zuppar in temp pli lung en il sistem da la gnerva da l'animal senza chaschunar sintoms. La malsogna po puspè prorumper da tut temp, per exempel en cas da stress. Alura vegnan mintgamai derasads virus che pon infectar auters animals. Pervia da quai ston vegnir mazzads tut ils animals infectads. Per l'uman n'è questa malsogna betg privlusa. Ella infectescha oravant tut arments.


Ulteriuras infurmaziuns davart la malsogna:
pagina d'internet dal USAV

Infurmaziuns:
Giochen Bearth, veterinari chantunal, Uffizi per la segirezza da victualias e per la sanadad d'animals, tel. +41 81 257 24 11, e‑mail Giochen.Bearth@alt.gr.ch



Gremi: Uffizi per la segirezza da victualias e per la sanadad d'animals
Funtauna: rg Uffizi per la segirezza da victualias e per la sanadad d'animals
Neuer Artikel