Navigaziun principala

Cuntegn da la pagina

Program d'aglomeraziun da la 4. generaziun per Cuira – las lavurs progredeschan

  • Erste Mitteilung
  • Neuen Beitrag einfügen

Suenter ina interrupziun da 4 onns vegn elavurà in nov program d'aglomeraziun per l'aglomeraziun da Cuira. Las lavurs èn progredidas bain, fin a l'inoltraziun dal program ils 15 da settember 2021 resta dentant anc bler da far.

La Confederaziun sa participescha a la finanziaziun da mesiras per meglierar l'infrastructura da traffic en citads ed en aglomeraziuns. La premissa è ch'in program d'aglomeraziun mussia l'accordanza dal svilup da l'abitadi e dal svilup dal traffic. Il conclus da finanziaziun vegn prendì en il parlament federal per perioda da program. En cas da l'ultim conclus sa tractavi d'in import da stgars 1 100 milliuns francs per tut la Svizra.

L'onn 2007 è vegnì elavurà l'emprim program d'aglomeraziun per l'aglomeraziun da Cuira. Alura è suandà in program d'aglomeraziun da la segunda generaziun l'onn 2012. La terza generaziun da program d'aglomeraziun è vegnida sursiglida per sa concentrar sin la realisaziun da las mesiras dals programs d'aglomeraziun vertents.

La primavaira 2019 han cumenzà – sut la direcziun da l'Uffizi per il svilup dal territori – las lavurs per in program d'aglomeraziun da la 4. generaziun. I collavuran las regiuns Plaun, Plessur e Landquart che sa chattan en il perimeter d'aglomeraziun ed uschia er lur vischnancas. En correspundenza cun las directivas da la Confederaziun tracta il nov program d'aglomeraziun pli detagliadamain ils temas abitadi, cuntrada e traffic. L'analisa da la situaziun e da la tendenza, il maletg dal futur, il basegn d'agir e las strategias parzialas sco er l'evaluaziun da las mesiras èn avant maun en furma d'in sboz. Las mesiras resguardan tut l'aglomeraziun. Las pli impurtantas èn:

• Optimaziuns en e vi da las staziuns per midar en moda efficazia tranter ils meds da traffic e tranter las ierarchias da rait.
• Extensiun da las vias da velo, l'element central è ina ruta quotidiana da velo da Razén fin Maiavilla.
• Revalitaziun da trajects da via cun bler traffic entaifer il vitg en ina moda che tegna quint da l'abitadi, e quai cun concepts da structura e da gestiun.
• Las mesiras d'infrastructura las pli grondas èn la colliaziun traversala en direcziun dal Scanvetg (punt da son Luzi) ed il vial per sviar a sanestra tar il Rosenhügel a Cuira.

La sfida dals proxims mais per ils posts responsabels dal chantun e da las vischnancas è quella da preparar las mesiras en ina moda uschè detagliada sco necessari. Il cumenzament da l'onn 2021 vegn fatga ina consultaziun dal program d'aglomeraziun tar las vischnancas, tar las regiuns e tar ils uffizis chantunals. Sin basa da las respostas vegn il program d'aglomeraziun precisà anc pli fitg. Ina collavuraziun publica ha alura lieu la primavaira 2021. Ils conclus necessaris da las vischnancas e da las regiuns involvidas ston esser avant maun fin la fin da zercladur 2021. Il program d'aglomeraziun vegn inoltrà a la Confederaziun sin basa d'in conclus da la Regenza. L'ultim termin per inoltrar quest program è ils 15 da settember 2021.


Infurmaziuns: 
dr. Boris Spycher, manader dal project / collavuratur scien, Uffizi per il svilup dal territori , tel. +41 81 257 23 06, e‑mail Boris.Spycher@are.gr.ch


Gremi: Uffizi per il svilup dal territori
Funtauna: rg Uffizi per il svilup dal territori

Neuer Artikel