Ils 4 da schaner 2021 è vegnida fatga l'emprima vaccinaziun da corona en il chantun. Dad ussa davent vaccineschan equipas da vaccinaziun mobilas las abitantas ed ils abitants da las chasas da persunas attempadas e da tgira en il Grischun. Ulteriuras gruppas da la populaziun pon pli probabel sa laschar vaccinar a partir da la segunda mesadad da schaner. Per acziuns da vaccinaziun pli grondas dovri vinavant pazienza, damai ch'ils chantuns n'han nagina influenza sin las furniziuns dals producents e da la Confederaziun.

Las emprimas dosas dal vaccin èn arrivadas a Cuira curt avant mezdi ed èn vegnidas prendidas encunter d'ina equipa da vaccinaziun mobila. L'emprima vaccinaziun è vegnida fatga il suentermezdi dals 4 da schaner 2021 ad ina abitanta en ina chasa da persunas attempadas e da tgira a Cuira. Tut en tut èn vegnidas vaccinadas il glindesdi suentermezdi 25 abitantas ed abitants da l'instituziun sco er 5 persunas spezialisadas dal sectur da sanadad. La vaccinaziun è pia vegnida cumenzada en il Grischun sco planisà.

Equipas da vaccinaziun mobilas en las chasas da tgira
Duas equipas da vaccinaziun mobilas èn ussa en acziun en tut il chantun per vaccinar las abitantas ed ils abitants sco er il persunal da las chasas da persunas attempadas e da tgira. La successiun vegn fixada en cunvegnientscha cun las chasas da persunas attempadas e da tgira, suenter che quellas han mintgamai eruì il basegn da vaccinaziuns per lur manaschi. Pervia da la disponibladad limitada dal vaccin vegnan vaccinadas il cumenzament da l'acziun da vaccinaziun las persunas spezialmain periclitadas sur 75 onns, resp. las abitantas ed ils abitants da las chasas da persunas attempadas e da tgira, il persunal da sanadad che ha contact cun pazientas e pazients ed il persunal da tgira da persunas spezialmain periclitadas.

La vaccinaziun facultativa, inclusiv la cussegliaziun da vaccinaziun tras la media u il medi ed il temp da paus da 30 minutas, dura tut en tut var 45 minutas per persuna. In'equipa mobila sa cumpona mintgamai d'ina media u d'in medi, d'ina assistenta da pratica medicala u d'in assistent da pratica medical, d'ina apotecra u d'in apotecher, d'ina persuna d'administraziun sco er d'ina manischunza u d'in manischunz.

Gronda lavur logistica
La vaccinaziun da corona è cumplexa areguard il transport, il deposit ed il vaccinar sco tal; il vaccin vegn furnì da l'Armada ad ina temperatura da minus 80 grads ad in logisticher. A temperaturas da frestgera po il vaccin Comirnaty® da Pfizer/BioNTech vegnir conservà mo durant 120 uras. Ina giada che las dosas dal vaccin èn prendidas ord frestgera, ston ellas vegnir dadas entaifer 6 uras. Cun in'ampulla dal vaccin pon vegnir vaccinadas tschintg persunas. Pervia da la gronda cumplexitad n'èsi actualmain betg pussaivel da sa laschar vaccinar da la media u dal medi da chasa ubain d'ina apotecra u d'in apotecher.

Per il mument stattan a disposiziun dosas dal vaccin per 1300 persunas. Fin la fin da mars ha la Confederaziun empermess da furnir al chantun Grischun tut en tut var 27 000 dosas dal vaccin da Pfizer/BioNTech. Fin la fin da favrer duessan vegnir furnidas ultra da quai da la Confederaziun al Grischun circa 23 000 dosas dal vaccin da Moderna. Quest vaccin è pli facil da tractar, el n'è dentant per il mument anc betg admess da Swissmedic. Sin la decisiun d'admissiun n'ha il chantun nagina influenza. En il cas ideal stattan a disposiziun al chantun – tenor il stadi da las enconuschientschas actualas – fin la fin da mars dosas per vaccinar 25 000 persunas. Questas indicaziuns pon puspè sa midar da tut temp tut tenor la situaziun tar il producent u tar la Confederaziun. Pervia da quai appellescha il chantun Grischun a la populaziun d'avair pazienza e d'observar vinavant strictamain tut las reglas da cumportament.

Centers da vaccinaziun e da test
La segunda mesadad da schaner vegnan ad esser en funcziun nov centers da vaccinaziun e da test che permettan a las ulteriuras gruppas da la populaziun da sa laschar vaccinar, uschespert che la Confederaziun furnescha considerablamain dapli dosas dal vaccin ch'ella ha empermess fin ussa. Pervia da las autas pretensiuns envers il deposit dal vaccin da Pfizer/BioNTech vegnan questas vaccinaziuns fatgas en ils ospitals regiunals pli gronds (Tavau, Glion, Puschlav, Schiers, Scuol, Tusaun). Plinavant èn planisads centers da vaccinaziun en la Val Mesauc, a Cuira ed a San Murezzan. Pervia da la disponibladad limitada dal vaccin stoi vegnir fatg quint che la gronda part da la populaziun po vegnir vaccinada pir a partir da l'avrigl. En il center stattan perquai ad interim persunas a partir da 75 onns cun malsognas cronicas cun la ristga la pli auta. Suenter suondan: persunas da 65 fin 74 onns, persunas sut 65 onns e persunas cun malsognas cronicas che n'èn betg anc vegnidas vaccinadas. Questas gruppas da la populaziun pon a temp util s'annunziar per la vaccinaziun sin via electronica sur ina plattafurma naziunala, u tras ina registraziun autonoma online u sur ina hotline telefonica che vegn manada dal chantun.

Suenter la preannunzia survegnan las persunas che vulan sa laschar vaccinar lur termins da vaccinaziun tut tenor la disponibladad dal vaccin. Ils termins vegnan attribuids tenor ils criteris dal UFSP (malsognas preexistentas, gruppas da vegliadetgna). Uschespert ch'igl è pussaivel da s'annunziar, vegnan publitgadas las infurmaziuns detagliadas en chaussa sin la pagina d'internet dal chantun (www.gr.ch/coronavirus).

Per pudair reducir ils dumbers da cas anc adina bler memia auts en tut la Svizra, vegnan augmentadas massivamain las capacitads per testar en ils centers da vaccinaziun e da test. A chaschun dals tests territorials mez december 2020 èsi sa mussà cleramain ch'il testar è – ultra da l'observar las reglas generalas d'igiena e da distanza – il med il pli cumprovà per reducir ils dumbers da cas en moda duraivla, fin ch'i stattan a disposiziun avunda dosas dal vaccin. Plinavant èsi planisà d'extender vinavant la pussaivladad da far ils tests en manaschis ed en interpresas.

Fotografia agiuntada:

©KFS GR/Mattias Nutt

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Funtauna: rg Departament da giustia, segirezza e sanadad