Testar repetidamain persunas asintomaticas mussa in effect che sa lascha mesirar cleramain ed è perquai in med adequat per interrumper las chadainas da transmissiun dal coronavirus. En cumplettaziun dal contact tracing existent vegn perquai realisada ina strategia chantunala da vaccinaziun e da test cun nov centers regiunals da vaccinaziun e da test sco er cun tests da massa regulars en manaschis ed en scolas.
Perquai ch'il dumber da cas è vinavant grond e perquai ch'il dumber da novas infecziuns stagnescha sin in aut nivel, vesa la Regenza grischuna in basegn d'agir urgent. Suenter la realisaziun da divers projects da pilot durant las emnas passadas ha ella perquai incumbensà il Stab directiv chantunal d'elavurar ils detagls d'ina strategia chantunala da vaccinaziun e da test e da realisar questa strategia. Areguard ils tests dal coronavirus surpiglia il chantun ina rolla da pionier en Svizra.
Nov centers regiunals da vaccinaziun e da test per la populaziun
Ils nov centers da test gia planisads vegnan extendids a centers da vaccinaziun e da test. Cun il manaschi na cumenzan els betg avant ils 20 da schaner 2021. Ils centers sa basan da princip sin l'infrastructura dals ospitals. Els permettan da testar persunas sintomaticas sco er persunas asintomaticas e duain vegnir duvrads per dus intents (vaccinar e testar). En il sectur da l'administraziun vegnan ils centers da vaccinaziun e da test sustegnids da la protecziun civila.
Repartiziun dals vaccins ed equipas da vaccinaziun mobilas
Uschespert ch'i stattan a disposiziun avunda vaccins, vegnan quels repartids tenor ina clav definida sin ils centers da vaccinaziun en las regiuns. Grazia a l'admissiun dal vaccin da Moderna duain er las medias ed ils medis da chasa vegnir integrads en il process da vaccinaziun. Perquai che la quantitad da vaccins è limitada, na duess quai dentant betg esser il cas avant ils 22 da favrer 2021.
Las equipas da vaccinaziun mobilas che vaccineschan actualmain las abitantas ed ils abitants da las chasas da persunas attempadas e da tgira en tut il chantun, han pudì far mintga di tut en tut var 200 vaccinaziuns durant las duas emprimas emnas.
Tests regulars en manaschis ed en scolas
L'evaluaziun dals tests fatgs en las regiuns, en ils manaschis ed en las scolas mussa che tests regulars gidan a reducir considerablamain las infecziuns. En tut las regiuns, nua ch'i èn vegnids fatgs tests da massa, è il dumber da novas infecziuns stà regressiv durant almain 5 dis. Grazia als tests posteriurs regulars en la regiun Bernina cuntinuescha quest svilup anc adina.
Tras tests da massa en manaschis ed en scolas duai vegnir pussibilità da testar regularmain – cun agid da tests da spida PCR – lavurantas e lavurants en manaschis sco er scolaras e scolars, emprendistas ed emprendists, studentas e students sco er persunas d'instrucziun en las scolas. Per reducir il dumber da tests ed uschia ils custs vegn elavurada la pussaivladad d'identifitgar sistematicamain e da testar prioritarmain quellas emploiadas e quels emploiads ch'èn particularmain exponids. Quai duai succeder cun agid d'in questiunari.
A maun dals tests en las scolas da Malans e da Schiers, nua ch'ins ha fatg tests svelts d'antigens sco er tests da spida PCR, poi vegnir mussà che tuttas duas metodas èn adattadas per far tests repetids. L'enconuschientscha dals tests da pilot è dentant quella che l'applicaziun da tests da spida PCR sto vegnir favurisada en manaschis ed en scolas, perquai che quests tests pon vegnir fatgs al lieu e perquai che la sensitivitad è pli gronda. Ils tests svelts d'antigens èn percunter adattads per far tests da massa en las regiuns ed en las vischnancas cun l'intent da verifitgar e da franar las infecziuns, oravant tut dentant er per constatar ils svilups dals dumbers da cas che dattan localmain e regiunalmain en egl sco er per analisar erupziuns.
En general mussan tut ils projects da pilot realisads che tests repetids èn in med adequat per interrumper a temp las chadainas da transmissiun dal coronavirus. En quest connex èsi impurtant ch'ils tests per identifitgar e per isolar persunas che portan en sai il coronavirus senza savair quai, vegnian coordinads e realisads cun in vast sustegn.
Tut en tut chaschuna la realisaziun dal concept da vaccinaziun e da test custs da var 25 milliuns francs (previsiblamain durant la perioda dal schaner fin l'avust 2021).
Contact tracing
Cun las collavuraturas ed ils collavuraturs da l'Uffizi da sanadad e cun il sustegn d'appartegnentas ed appartegnents da la protecziun civila è il contact tracing dal Grischun posiziunà bain. Actualmain (stadi: 14 da schaner 2021, a las 08.00) èn 570 persunas en isolaziun e 655 persunas en quarantina en il chantun. Ultra da l'assistenza da persunas pertutgadas ordinescha il team dal contact tracing mintga di var 10 cas davent da la quarantina en l'isolaziun. Quai mussa ch'il contact tracing funcziuna e ch'el è ina mesira ordvart impurtanta per cumbatter cunter la pandemia.
Beilage:
strategia cumplessiva da vaccinaziun e da test
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: rg Departament da giustia, segirezza e sanadad