A San Murezzan è vegnida constatada ina derasaziun pli gronda dal coronavirus mutà. L'Uffizi da sanadad dal Grischun ha perquai mess en quarantina dus hotels ed ordinà da far tests da massa en ils dus manaschis pertutgads. Ultra da quai vegnan serradas ad interim las scolas sco er las scolas da skis a San Murezzan. L'obligaziun da purtar ina mascrina vala da nov sin tut il territori communal.
L'Uffizi da sanadad dal Grischun ha registrà la dumengia saira ina derasaziun pli gronda dal coronavirus mutà a San Murezzan. En dus hotels èn actualmain enconuschents circa ina dunsaina cas. Per proteger la sanadad da la populaziun e dals giasts ha l'Uffizi da sanadad mess en quarantina ils dus hotels ed ordinà tests da corona per las collavuraturas ed ils collavuraturs sco er per ils giasts da quests hotels. Plinavant vegn organisà mardi, ils 19 da schaner 2021, in test da massa per la populaziun da la vischnanca da San Murezzan. Quel vegn realisà analogamain al project da pilot da mez december. L'Uffizi da sanadad recumonda urgentamain a las abitantas ed als abitants sco er als giasts da San Murezzan da sa participar a quest test.
Obligaziun da purtar ina mascrina a San Murezzan
Las scolas e las canortas d'uffants a San Murezzan restan serradas ad interim. Er las scolas da skis a San Murezzan ston interrumper lur manaschi per entant. Activitads d'uniun e trenaments da sport cun giuvenils na duain betg avair lieu per il mument. Plinavant vala a partir d'immediat l'obligaziun da purtar ina mascrina sin tut il territori communal da San Murezzan.
L'Uffizi da sanadad è preoccupà: il virus mutà è bler pli contagius che la varianta derasada fin ussa sin l'entir mund. L'Uffizi da sanadad recumonda urgentamain a las abitantas ed als abitants sco er als giasts da desister da tut ils contacts betg necessaris cun autras persunas e d'observar consequentamain las reglas da distanza e d'igiena vertentas.
Grazia a la strategia da test activa e grazia a las experientschas fatgas cun ils tests da pilot po l'Uffizi da sanadad realisar svelt mesiras sistematicas cunter la derasaziun dal coronavirus mutà a San Murezzan. L'Uffizi da sanadad stat en in stretg barat cun il Stab directiv communal da San Murezzan e vegn a relaschar sche necessari ulteriuras mesiras.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: rg Departament da giustia, segirezza e sanadad