Navigaziun principala

Cuntegn da la pagina

Las premissas per tegnair avert ils territoris da skis èn vinavant ademplidas

  • Erste Mitteilung
  • Neuen Beitrag einfügen

La Regenza ha prendì enconuschientscha dal fatg che las premissas per tegnair avert ils territoris da skis èn actualmain vinavant ademplidas. La vasta strategia da tests da corona ha sustegnì questa decisiun. Perquai ha la Regenza prolungà la permissiun da tegnair avert ils territoris da skis fin e cun dumengia, ils 28 da favrer 2021.

La Regenza ha prolungà la permissiun da tegnair avert ils territoris da skis fin dumengia, ils 28 da favrer 2021, a las 24.00. Sustegnì questa decisiun han il vast concept da test sco er il giudicament da la situaziun epidemiologica en il chantun Grischun. Ils indicaturs mussan che la situaziun è sa meglierada. Ils tests repetids fan effect. Il dumber da persunas che sa chattan en isolaziun è sa reducì vinavant. Il dumber da novas infecziuns per di e per emna sco er la valur da reproducziun decisiva èn sa diminuids vinavant. La situaziun areguard las capacitads libras en las staziuns da tgira intensiva è però anc adina precara. Las activitads da sport d'enviern n'engrevgeschan actualmain dentant strusch las staziuns da tgira intensiva. Quitads a la Regenza fa percunter la cumulaziun dal virus mutà en Engiadin'Ota. La situaziun ed ils resultats da las acziuns da test currentas vegnan persequitads cun l'attenziun maximala.

Evitar fullas da glieud
Las experientschas da las ultimas emnas cun tegnair avert ils territoris da skis mussan ch'ils giasts vegnan – cun excepziun dals dis da grond traffic – repartids bain sin las differentas purschidas e ch'i pon uschia – cun paucas excepziuns – vegnir evitadas fullas da glieud. Er ils territoris da skis han ademplì lur incumbensas e gidà ad evitar per gronda part fullas da giasts. Nua che quai è stà necessari, han ils gestiunaris meglierà cuntinuadamain lur concepts da protecziun e la realisaziun da tals. La finala ha er la limitaziun voluntara dal dumber da persunas en ils territoris da skis gidà a reducir las fullas da glieud. La Regenza appellescha als territoris da skis da betg laschar suenter e da realisar er vinavant consequentamain ils concepts da protecziun. Medemamain èn dumandadas las persunas indigenas sco er ils giasts d'observar strictamain tut las prescripziuns e da sa mover cun respect en ils territoris da skis. Cun la mutaziun dal coronavirus è quai pli impurtant che mai. En vista a la situaziun da lavinas actuala stoi en mintga cas er vegnir tralaschà da bandunar las pistas marcadas.

La Regenza giuditgescha cuntinuadamain il svilup da las premissas epidemiologicas. En cas che la situaziun sa midass, pudess la permissiun vegnir retratga dals manaschis da sport d'enviern, sche las premissas na fissan betg pli ademplidas.

 

Foto Skigebiet Savognin
©Marco Hartmann/GRF

 

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Gremi: Regenza
Funtauna: rg Chanzlia chantunala

Neuer Artikel