Navigation

Inhaltsbereich

  • Erste Mitteilung
  • Neuen Beitrag einfügen

Dapi ils 4 da schaner 2021 vegni vaccinà en las chasas da persunas attempadas e da tgira. Il chantun tira in facit positiv. Fin ussa èn vegnidas vaccinadas 4035 persunas cun las emprimas dosas dal vaccin. Suenter che l'Uffizi federal da sanadad ha publitgà oz per l'emprima giada cifras davart il stadi da vaccinaziun actual en Svizra, vegn er il chantun a preschentar las cifras actualas a partir da l'emna proxima.

L'Uffizi federal da sanadad (UFSP) ha publitgà oz il stadi actual da las vaccinaziuns cunter il coronavirus. Pervia da retardaments da communicaziun en singuls chantuns e pervia dal dumber da posts involvids en la logistica divergeschan las cifras communitgadas dal UFSP da las cifras actualas dal chantun. Perquai vegn il chantun Grischun a communitgar cuntinuadamain sias cifras sin la pagina d'internet www.gr.ch/coronavirus a partir da l'emna proxima. Il UFSP è dumandà da furnir svelt las dosas da vaccinaziun empermessas e da garantir ina repartiziun gista dals vaccins disponibels sin ils chantuns.

In'applicaziun correcta garantescha ina statistica correcta
Il chantun Grischun observa las prescripziuns dals producents dals dus vaccins ch'èn admess fin ussa sco er las directivas dal UFSP. Mintga persuna che duai vegnir vaccinada sto vegnir vaccinada duas giadas entaifer 3 fin 4 emnas cun il vaccin dal medem producent, pia ubain duas giadas cun il vaccin da Pfizer/BioNTech ubain duas giadas cun quel da Moderna. Quai vul dir che la mesadad da las dosas furnidas sto vegnir "reservada" per la segunda vaccinaziun e na po betg vegnir duvrada directamain. Las persunas che ston vegnir vaccinadas sco emprimas èn vegnidas attribuidas dal UFSP a gruppas da ristga. Giuvenils sut 16 onns na vegnan ultra da quai betg vaccinads. Uschia sto il Grischun planisar ina vaccinaziun facultativa per bundant 171 000 persunas. Actualmain sa preschenta la situaziun en il Grischun sco suonda (stadi dals 21 da schaner 2021, a las 17.30):

Dosas garantidas e/u furnidas dal UFSP:

Pfizer/BioNTech (Comirnaty)
Fin ils 17 da schaner dosas garantidas: 6000 dosas furnidas: 6000
Fin ils 18 da schaner dosas garantidas: 3000 dosas furnidas: 1000
Per ils 25 da schaner dosas garantidas: 3000 dosas furniblas previsiblamain: 1000
Per ils 5 da favrer dosas garantidas: 5000 dosas furniblas previsiblamain: 1000
Per ils 15 da favrer dosas garantidas: 5000 dosas furniblas previsiblamain: 1000
Moderna
Per ils 13 da schaner dosas garantidas: 5100 dosas furnidas: 5100*
*Da quellas èn 2900 dosas èn vegnidas furnidas als centers da vaccinaziun. 

Fin ussa èn vegnidas duvradas totalmain 4035 dosas per vaccinaziuns (tuttas emprimas dosas, q.v.d. dosas reservadas: 8070); en 50 da 52 chasas da persunas attempadas e da tgira èn las abitantas ed ils abitants gia vegnids vaccinads; fin ils 21 da schaner 2021 èn pia vegnids vaccinads 2,35 pertschient da tut la populaziun grischuna che vegn en dumonda per ina vaccinaziun. Bundant la mesadad da las dosas da vaccinaziun è vegnida duvrada u è reservada per ina vaccinaziun. Tut las dosas furnidas actualmain èn planisadas en moda fixa per ina vaccinaziun (emprimas e segundas dosas).

Betg engrevgiar nunnecessariamain la logistica cumplexa en il Grischun
La vaccinaziun sin l'entir territori dal Grischun è – mo gia pervia da la geografia – bler pli pretensiusa che en auters chantuns. Il chantun tracta tut las regiuns tuttina e metta a disposiziun las dosas da vaccinaziun disponiblas en tut las regiuns proporziunalmain tenor la populaziun. L'acziun da vaccinaziun en il Grischun ha cumenzà cun success ils 4 da schaner 2021. In problem è dentant il fatg che las indicaziuns dal UFSP davart las furniziuns ch'èn da survegnir dal producent Pfizer/BioNTech, midan d'in cuntin. Quai engrevgescha supplementarmain la planisaziun. Perquai spetga il chantun ch'il UFSP na chastia betg anc en moda arbitrara quels chantuns che planiseschan en moda prospectiva, che han anticipà stretgas tar la furniziun e che han dà dapli pais a la segirezza da las persunas da vaccinar e main pais a la sveltezza. Il UFSP e la Confederaziun ston acceptar ch'ils chantuns realiseschan las vaccinaziuns en lur cumpetenza tut tenor las circumstanzas. Il UFSP n'organisescha betg l'acziun da vaccinaziun dals chantuns. El sto dentant garantir ina clav da repartiziun che sa basa unicamain sin il dumber d'abitantas ed abitants, per ch'ils chantuns hajan ina segirezza da planisaziun.

La prontezza allegraivla da sa laschar vaccinar pretenda in pau pazienza da la populaziun
Actualmain datti cleramain dapli annunzias che vaccins. Pervia da la disponibladad limitada dal vaccin vegnan ils termins per la vaccinaziun assegnads cuntinuadamain entaifer las gruppas en mira. Il chantun engrazia a la populaziun per ses sustegn e per la pazienza necessaria, fin che tut las persunas che giavischan ina vaccinaziun, èn vegnidas vaccinadas.


Infurmaziuns: 
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Funtauna:Uffizi da sanadad

Neuer Artikel