En la scola d'Arosa è vegnida constatada ina derasaziun pli gronda dal coronavirus mutà. Sco mesira da protecziun ha l'Uffizi da sanadad dal Grischun serrà la scola fin sonda, ils 6 da favrer 2021, ordinà in test da massa per venderdi e sonda e decretà in'obligaziun da purtar ina mascrina sin tut il territori communal abità.
Il mardi en damaun ha l'Uffizi da sanadad dal Grischun registrà en la scola d'Arosa trais cas dal coronavirus mutà. Sin basa d'ina analisa immediata da l'erupziun en la scola pertutgada èn vegnids confermads actualmain 14 cas – tut mutaziuns. Per proteger la sanadad da la populaziun e dals giasts ha l'Uffizi da sanadad serrà la scola fin sonda, ils 6 da favrer 2021. En la vischnanca d'Arosa han plinavant lieu venderdi, ils 29, e sonda, ils 30 da schaner 2021, tests da massa cun la populaziun e cun ils giasts. Ils tests da PCR vegnan realisads da medema maniera sco ils projects da pilot da mez december 2020 e sco il test da massa da l'emna passada a San Murezzan. L'Uffizi da sanadad recumonda urgentamain a las abitantas ed als abitants sco er als giasts d'Arosa da sa participar a quest test. Las experientschas a San Murezzan mussan ch'ils tests da massa han in effect svelt e persistent sin la reducziun dals dumbers da cas sco er sin la franada dal virus mutà.
Ils territoris da sport da naiv d'Arosa e da Lai restan averts sco manaschis separads
La scola e las canortas d'uffants ad Arosa restan serradas fin sonda, ils 6 da favrer 2021. Er las scolas da skis ad Arosa ston interrumper lur manaschi per entant. Activitads d'uniuns e trenaments da sport cun giuvenils na duain betg avair lieu per il mument. Plinavant vala a partir d'immediat in'obligaziun da purtar ina mascrina sin tut il territori communal abità d'Arosa. Per evitar ch'i dettia maschaidas tranter ils giasts da sport d'enviern, vegn serrada la colliaziun dals dus territoris da sport da naiv Arosa e Lai fin e cun sonda, ils 6 da favrer 2021. Las telefericas ad Arosa ed a Lai restan avertas, dentant sco manaschis separads.
L'Uffizi da sanadad è preoccupà: il virus mutà è bler pli contagius che la varianta derasada fin ussa sin l'entir mund. Perquai recumonda l'Uffizi da sanadad urgentamain a las abitantas ed als abitants sco er als giasts da desister da tut ils contacts betg necessaris cun autras persunas e d'observar consequentamain las reglas da distanza e d'igiena vertentas.
Grazia a la strategia da test activa e grazia a las experientschas fatgas cun ils tests da pilot pon l'Uffizi da sanadad e las vischnancas involvidas realisar svelt mesiras sistematicas cunter la derasaziun dal coronavirus mutà a Arosa. L'Uffizi da sanadad stat en in stretg contact cun il Stab directiv communal d'Arosa e vegn a decretar sche necessari ulteriuras mesiras.
Ils resultats dals tests da massa na vegnan betg ad esser disponibels avant la dumengia saira dals 31 da schaner 2021.
Infurmaziun per las collavuraturas ed ils collavuraturs da las medias:
L'Uffizi da sanadad dal Grischun decretescha mesiras per proteger la populaziun e per impedir che la mutaziun sa derasia anc pli fitg. Nus recumandain expressivamain a las collavuraturas ed als collavuraturs da las medias da betg sa render ad Arosa.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: rg Departament da giustia, segirezza e sanadad