L'analisa dals 2000 tests da corona fatgs ad Arosa ha mussà che las infecziuns han gì lieu principalmain en ils conturns da la scola. Sin fundament da questa localisaziun vegnan las mesiras per proteger la populaziun puspè abolidas per glindesdi en damaun, il 1. da favrer 2021. La scola resta serrada per entant fin sonda, ils 6 da favrer 2021.
Pervia d'ina derasaziun pli gronda dal coronavirus mutà en la scola d'Arosa aveva l'Uffizi da sanadad dal Grischun fatg mardi, ils 26 da schaner 2021, in'analisa da l'erupziun a la scola d'Arosa e pudì filtrar 20 mutaziuns dal coronavirus. Sin quai èn vegnidas relaschadas mesiras immediatas per proteger la sanadad da la populaziun e dals giasts. Uschia han ins serrà las scolas e las scolas da skis d'Arosa, interrut la colliaziun dals dus territoris da skis Arosa e Lai ed introducì l'obligaziun generala da purtar ina mascrina sco er ordinà in test da massa durant dus dis.
Las mutaziuns èn resultadas principalmain en ils conturns da la scola
La bilantscha intermediara dals tests da massa durant dus dis cumpiglia en il fratemp 2570 provas (stadi dals 31 da schaner 2021, a las 20.00). I èn vegnidas confermadas 58 infecziuns cun il virus SARS-CoV-2, 45 da quellas pertutgan mutaziuns (B.1.1.7). 350 resultats mancan anc. Ils cas positivs derivan principalmain dals conturns da la scola, en emprima lingia da scolaras e scolars, da lur geniturs sco er da persunas d'instrucziun. Per quest motiv ha l'Uffizi da sanadad abolì las mesiras per proteger la populaziun ed ils giasts per glindesdi en damaun, il 1. da favrer 2021. Uschia pon puspè vegnir avertas las scolas da skis e la teleferica da colliaziun. Areguard l'obligaziun da purtar ina mascrina valan puspè las reglas ch'èn previsas en il concept da protecziun per la destinaziun da sport d'enviern. L'entira scola d'Arosa resta percunter serrada per entant fin sonda, ils 6 da favrer 2021, e tut las scolaras ed ils scolars restan en quarantina.
Realisaziun svelta grazia a las experientschas fatgas fin ussa
L'Uffizi da sanadad engrazia a la populaziun ed als giasts per la fitg gronda participaziun al test da massa sco er al Stab directiv communal per la buna collavuraziun. Uschia èsi stà pussaivel d'identifitgar persunas che portan en sai il virus e d'interrumper 58 chadainas d'infecziun. Grazia a la strategia da test activa ed a las experientschas cun ils tests da massa fatgs fin ussa èsi stà pussaivel per l'Uffizi da sanadad e per la vischnanca d'Arosa da realisar suenter mo 36 uras in test da massa per l'entira populaziun.
Observar vinavant las reglas da distanza e d'igiena
L'Uffizi da sanadad avertescha da negligientscha e recumonda vinavant urgentamain a las abitantas ed als abitants sco er als giasts da desister da tut ils contacts betg necessaris cun autras persunas e d'observar consequentamain las reglas da distanza e d'igiena vertentas. Gia en cas da sintoms levs vegni recumandà da far in test da corona per proteger l'ambient persunal.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: Uffizi da sanadad