Navigaziun principala

Cuntegn da la pagina

Coronavirus: La Regenza ha extendì l'obligaziun da purtar ina mascrina sin la 5. e 6. classa primara

  • Erste Mitteilung
  • Neuen Beitrag einfügen

Perquai ch'i èn stads pertutgads pli savens er scolaras e scolars da las mutaziuns dal coronavirus, ha la Regenza introducì l'obligaziun da purtar ina mascrina per las scolaras ed ils scolars da la 5. e 6. classa primara. Quella vegn messa en vigur gievgia, ils 11 da favrer 2021, e vala fin ch'i suonda ina nova decisiun.

Il sectur da furmaziun ha la finamira suprema da garantir l'incumbensa d'educaziun e da furmaziun per tut las scolaras e tut ils scolars en il chantun Grischun. Quai gartegia il meglier, sch'il manaschi da scola po avair lieu cun l'instrucziun da preschientscha. Per che questas finamiras possian vegnir cuntanschidas, extenda la Regenza l'obligaziun da purtar ina mascrina sin la 5. e 6. classa primara. Questa mesira vegn relaschada per proteger las scolaras ed ils scolars, las famiglias, las persunas d'instrucziun e lur conturns, perquai ch'i èn stads pertutgads pli savens er scolaras e scolars da las mutaziuns dal coronavirus las emnas passadas.

Per che la scola possia porscher vinavant ina instrucziun da preschientscha, ha la Regenza relaschà – en cumplettaziun da l'obligaziun existenta da purtar ina mascrina ed en cumbinaziun cun ils tests planisads en las scolas – las suandantas mesiras da protecziun supplementaras:

En las scolas popularas publicas e privatas inclusiv las instituziuns da la scolaziun speziala en il chantun Grischun vala a partir da gievgia, ils 11 da favrer 2021, per tut las scolaras e tut ils scolars da la 5. e 6. classa primara in'obligaziun generala da purtar ina mascrina sin l'areal da scola (inclusiv ils secturs d'abitar da las instituziuns da la scolaziun speziala). Las instituziuns da la scolaziun speziala pon fixar sur lur medias e medis d'instituziun – en cunvegnientscha cun la media chantunala – excepziuns motivadas da l'obligaziun da purtar ina mascrina.

La nova regulaziun cumplettescha il conclus da la Regenza dals 21 da december 2020 e vala, fin ch'ella vegn adattada u revocada.


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)


Gremi: Regenza
Funtauna: rg Regenza

Neuer Artikel