Navigaziun principala

Cuntegn da la pagina

Al Grischun manca dapli ch'in quart dals vaccins empermess

  • Erste Mitteilung
  • Neuen Beitrag einfügen

Dapli ch'in quart da las dosas da vaccinaziun che l'Uffizi federal da sanadad publica aveva empermess, n'ha il chantun Grischun betg survegnì. Tuttina han gia bunamain 10 000 persunas pudì vegnir vaccinadas cunter il nov coronavirus. En las chasas da persunas attempadas e da tgira èn las vaccinaziuns quasi terminadas. Passa 17 000 persunas èn s'annunziadas per ina vaccinaziun.

Malgrà retardaments tar la furniziun dals vaccins han bunamain 10 000 persunas pudì vegnir vaccinadas fin ussa en il Grischun cunter il nov coronavirus. Perquai ch'igl è vegnì furnì mo 73 pertschient da las dosas da vaccinaziun empustadas oriundamain, sa chatta il Grischun lunsch davos il plan da vaccinaziun oriund. Bain ha il chantun Grischun retratg e gia injectà u planisà tut las dosas da vaccinaziun empermessas da l'Uffizi federal da sanadad publica (UFSP) – empè da 31 325 dosas ha el dentant survegnì mo 23 000 dosas. Uschia pon 11 500 persunas mintgamai vegnir vaccinadas duas giadas.

Da las 9894 persunas vaccinadas fin ussa han 73 pertschient passa 60 onns u appartegnan a la gruppa da ristga da las persunas cun malsognas cronicas. Ellas han per exempel cancer, malsognas d'autoimmunitad u sclerosa multipla. Ultra da senioras e seniors sco er da persunas cun malsognas cronicas èn vegnids vaccinads er collavuraturas e collavuraturs dals fatgs da sanadad, per exempel da chasas da persunas attempadas, da staziuns da COVID e da staziuns intensivas.

Quasi terminà las vaccinaziuns en las chasas da persunas attempadas
En las chasas da persunas attempadas e da tgira en il Grischun han ins pudì vaccinar durant las ultimas 6 emnas gia 4317 abitantas ed abitants sco er collavuraturas e collavuraturs. Uschia èn ils programs da vaccinaziun quasi terminads. En questas chasas èn las vaccinaziuns spezialmain impurtantas, perquai ch'ellas han displaschaivlamain stuì registrar la mesadad dals mortoris durant l'emprima e durant la segunda unda.

En ils nov centers da vaccinaziun regiunals dal Grischun èn vegnidas vaccinadas fin ussa var 5500 persunas. Pervia da la mancanza da vaccins n'han ils centers da vaccinaziun dal Grischun betg pudì trair a niz lur capacitads planisadas. Intgins termins fixads han schizunt stuì vegnir spustads.

L'interess per las vaccinaziuns è fitg allegraivel: Dapi ils 12 da schaner 2021 èn passa 17 000 persunas s'annunziadas per ina vaccinaziun. Pervia da la mancanza da vaccins n'han var 11 500 dad ellas dentant betg anc survegnì in termin. Persunas ch'èn s'annunziadas ils 12 da schaner 2021 e che spetgan anc adina sin in termin da vaccinaziun, duessan previsiblamain survegnir fin mez mars lur emprima vaccinaziun.

Problems cun il sistem d'annunzia da la Confederaziun
Ils termins da vaccinaziun vegnan surdads sur il sistem d'annunzia dal UFSP. Durant ils emprims dis hai apparentamain dà cumplicaziuns tar l'attribuziun dals termins da vaccinaziun, uschia che quella n'ha betg funcziunà sco previs tenor la successiun da las annunzias. Il chantun deplorescha quests displaschairs, n'ha dentant nagina influenza sin il sistem e sin la surdada dals termins. El spetga che las irregularitads tar la surdada dals termins vegnian curregidas uschè svelt sco pussaivel.

Persunas senza domicil en Svizra (cun excepziun da cunfinarias e cunfinaris che lavuran en il sectur da sanadad) na survegnan betg ina vaccinaziun en Svizra. Ellas ston s'annunziar en lur pajais da domicil per ina vaccinaziun. Ils centers da vaccinaziun pon refusar talas persunas, er sch'ellas eran s'annunziadas per ina vaccinaziun.


Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch


Gremi: Uffizi da sanadad
Funtauna: rg Uffizi da sanadad

Neuer Artikel