Navigaziun principala

Cuntegn da la pagina

Dapli protecziun per uffants e per giuvenils durant il temp da scola

  • Erste Mitteilung
  • Neuen Beitrag einfügen

Cun agid da novas directivas davart il process d'engaschament en il context da la scola augmenta il Departament d'educaziun, cultura e protecziun da l'ambient la protecziun per uffants e per giuvenils en las scolas grischunas.

Las novas directivas dal Departament d'educaziun, cultura e protecziun da l'ambient (DECA) obligheschan ils purtaders da scola da las scolas popularas, da las scolas professiunalas spezialisadas e da las scolas medias sco er da las soluziuns transitoricas da pretender da las candidatas e dals candidats – en il rom dal process d'engaschament – in extract privat (correspunda a l'extract dal register penal vertent) ed in extract privat spezial, cur che persunas d'instrucziun, persunas d'assistenza e persunas spezialisadas sco er commembras e commembers da la direcziun da scola vegnan engaschads da nov. L'extract privat spezial infurmescha, sch'igl è scumandà a la candidata u al candidat d'exequir in'activitad cun persunas minorennas u cun autras persunas cun in basegn da protecziun spezial.

Cun relaschar questas directivas ademplescha il DECA er in giavisch dal Cussegl grond. Ina intervenziun da la deputada Favre‑Accola inoltrada durant la sessiun da zercladur 2019 ha pretendì d'augmentar la protecziun d'uffants e da giuvenils durant il temp da scola cun relaschar directivas en connex cun il process d'engaschament en il context da scola e d'als proteger uschia meglier cunter abus sexual e cunter abus en general.


Infurmaziuns: 
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch


Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient

Neuer Artikel