En scolas da tut las regiuns dal chantun Grischun vegnan ussa fatgs tests da COVID-19. Ina giada per emna spidan las scolaras ed ils scolars en ina bavrola e laschan analisar la prova en il labor. Uschia pon chadainas da transmissiun vegnir reducidas e quarantinas per l'entira classa u scola pon vegnir evitadas.
La gronda part da las vacanzas da sport va a fin en il Grischun e per las scolaras ed ils scolars en il chantun cumenza cun quai puspè l'instrucziun. La gronda part d'ellas ed els vegn da nov a far in test da spida PCR ina giada per emna en la stanza da scola. La participaziun a quests tests è facultativa per tut las persunas e per tut ils purtaders da scola. Tuttina sa participeschan gia 19 000 scolaras e scolars da 109 scolas grischunas – da la scolina fin al gimnasi – a questa acziun. La finamira è quella: constatar a temp ed interrumper chadainas da transmissiun per mantegnair l'instrucziun da preschientscha.
Ils tests da spida PCR sa laschan integrar bain en il mintgadi da scola
Ils tests da spida PCR sa laschan integrar bain en il mintgadi da scola e na chaschuna betg blera lavur. Las scolaras ed ils scolars sco er lur persunas d'instrucziun survegnan ina bavrola ch'è emplenida cun ina soluziun d'aua da sal. Quella gargariseschan ellas ed els durant 60 secundas en bucca e spidan alura tut enavos en la bavrola. La bavrola dattan ellas ed els a la persuna d'instrucziun che maschaida las provas (pool da gruppa) e las prepara per il transport en il labor.
Ils tests vegnan fatgs en la procedura da pooling
L'uschenumnada procedura da pooling vegn applitgada tar gruppas per constatar a temp infecziuns. Cun quella procedura na ston betg vegnir analisads ils singuls tests – quai che fiss fitg pretensius per la logistica e per las resursas – mabain mo ina prova per 15 persunas. Sche quella è positiva, vegnan tut las scolaras e tut ils scolars d'ina classa inclusiv la persuna d'instrucziun da la classa testads anc ina giada e las provas vegnan analisadas ina per ina. Grazia a questa procedura ston mo las persunas cun in resultat positiv dal test ir en quarantina e betg tut la classa. Perquai ch'ins chatta uschia er persunas che na mussan nagins sintoms, sa laschan interrumper svelt las chadainas da transmissiun. Quai pussibilitescha da manar vinavant l'instrucziun da preschientscha.
Success tar ils tests da pilot en scolinas ed en scolas primaras
Per incumbensa da la Regenza ed en collavuraziun cun la Scola auta da pedagogia dal Grischun sco er cun il Departament d'educaziun, cultura e protecziun da l'ambient e cun ils uffizis da furmaziun ha il Stab directiv chantunal concepì e realisà ils tests en las scolas. Il project è dividì en trais fasas: Suenter ina fasa da preparaziun, durant la quala èn vegnids fatgs divers tests da pilot, vegn lantschada la fasa d'iniziaziun suenter las vacanzas da sport. Las scolaras ed ils scolars da scolas professiunalas spezialisadas na vegnan betg testads en ils centers da furmaziun, mabain – en il rom dals tests en ils manaschis – per gronda part tar lur patruns. Las scolas medias sa participeschan er als tests en las scolas. Suenter che la fasa d'iniziaziun è terminada pon – en ina terza fasa – vegnir resguardadas ed integradas en ils tests en las scolas ulteriuras instituziuns sco per exempel scolas spezialas u canortas d'uffants e.u.v.
Video davart ils tests en las scolas: