Navigaziun principala

Cuntegn da la pagina

In gir virtual tras il convict renovà

  • Erste Mitteilung
  • Neuen Beitrag einfügen

Il bindel è taglià: oz en damaun han il president da la Regenza Mario Cavigelli ed il cusseglier guvernativ Jon Domenic Parolini avert uffizialmain a Cuira il convict renovà. La populaziun ha la pussaivladad d'explorar l'edifizi sin via virtuala. In video interactiv da 360 grads accumpogna las persunas interessads tras il vegl, ma tuttina nov convict.

Cun in "di da las portas avertas" dueva il convict renovà vegnir avert cun in act festiv. Las utilisadras ed ils utilisaders, il patrun da construcziun sco er tut las persunas ed interpresas participadas a la construcziun avessan gì plaschair da dastgar preschentar persunalmain l'ovra a la populaziun. Ma la pandemia da corona cumonda anc adina fermamain il mintgadi, uschia ch'i n'è betg pussaivel d'organisar ina tala occurrenza.

In gir virtual tras il convict
Per tuttina pussibilitar a la populaziun da prender invista dal convict renovà – ch'è in dals edifizis ils pli marcants a Cuira – ha l'Uffizi da construcziun auta realisà in'aventura interactiva da 360 grads. Il video mussa l'exteriur unic cun la fatschada da betun natiral e cun la graduaziun caracteristica da l'edifizi. Plinavant vegnan las aspectaturas ed ils aspectaturs accumpagnads tras ils access verticals ed orizontals extendids en la sala da mangiar represchentativa, en la nova cuschina da manaschi cun il buffet, en las chombras singulas e dublas per las abitantas ed ils abitants, en ils locals da segiurn, en il cinema, en il local da fitness sco er en ils secturs generals d'emprender e da temp liber. En tut las linguas chantunalas mainan vuschs simpaticas tras las localitads e dattan infurmaziuns cumplementaras interessantas davart l'architectura extraordinaria, davart las pretensiuns cumplexas e davart las particularitads d'ina renovaziun ed en spezial davart il mund da viver e da lavur da las abitantas e dals abitants. Il video stat a disposiziun sin la pagina d'internet e sin il chanal da YouTube dal chantun Grischun.

Neuer Artikel

Ina "chasa d'abitar" sco lieu da cuminanza
Il convict ha ina lunga tradiziun en l'istorgia da la Scola chantunala grischuna. La vita cuminaivla da las scolaras e dals scolars che derivan da vitgs e da valladas pli lontanas dal chantun è gia adina stada in element impurtant dal temp da studi. La cuminanza en il convict ha oz sco pli baud il medem senn. In microcosmos plain vita – in lieu, nua che las linguas e las culturas dal Grischun s'inscuntran. Ma er in lieu d'emprender per scolaras e scolars da tut las valladas. Qua vegn la trilinguitad grischuna vivida en moda evidenta. Tras la renovaziun cumplessiva dal convict survegnan las scolaras ed ils scolars in dachasa che correspunda als standards d'ozendi e che porscha als giuvenils in'atmosfera animanta, e quai puspè durant blers onns.

Spiert incumparabel d'ina lingua architectonica singulara – veglia qualitad en nova splendur
Ils basegns areguard la renovaziun dal convict èn stads fitg differents: d'ina vart il mantegniment da qualitads architectonicas, da l'autra vart l'observanza da las prescripziuns legalas actualas e betg sco ultim las pretensiuns tras il diever quotidian. Il convict tutga tar ils edifizis extraordinaris dal modernissem dal suenterguerra en il Grischun. Sia valur architectonica culturala è impurtanta. Suenter var 50 onns ha l'edifizi demussà in grond basegn da sanaziun, tant dadens sco er dadora. Il standard antiquà ha pretendì ina renovaziun cumplessiva. Il project general ha cumpiglià la renovaziun e la reparaziun da las paraids e dals mirs exteriurs da l'edifizi sco er da las construcziuns internas, il remplazzament da l'entira tecnica da chasa e la realisaziun da las pretensiuns legalas actualas.

L'edifizi sa preschenta en nova splendur ed ha tuttina mantegnì sia tempra cumprovada. Las autas qualitads dals spazis interiurs ed exteriurs han pudì vegnir mantegnidas. Las pretensiuns envers la durabilitad, l'ecologia, l'effizienza energetica e la construcziun senza obstachels èn realisadas. Grazia a sia auta qualitad pratica, a sia fatschada expressiva ed a sia posiziun privilegiada sur ils tetgs da Cuira vegn il convict renovà ad ademplir er vinavant cumplainamain sia rolla sco chasa da cuminanza impurtanta.

Fotografias agiuntadas:

Foto Kovikt Chur
©Ingo Rasp
Foto 2, Foto 3, Foto 4


Agiunta:
broschura d'infurmaziun


Infurmaziuns:
- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Markus Dünner, architect chantunal, Uffizi da construcziun auta dal Grischun, tel. +41 81 257 36 31, e-mail Markus.Duenner@hba.gr.ch

 

Gremi: Uffizi da construcziun auta dal Grischun
Funtauna: rg Uffizi da construcziun auta dal Grischun