Navigaziun principala

Cuntegn da la pagina

30 onns geoinfurmaziuns – indispensablas per l'economia e per l'administraziun

  • Erste Mitteilung
  • Neuen Beitrag einfügen

Il mars 2021 ha il sistem d'infurmaziun geografica (SIG) dal chantun Grischun festivà ses giubileum da 30 onns. El cuntegna geoinfurmaziuns impurtantas che vegnan duvradas da l'administraziun, da l'economia, da la scienza e da persunas privatas sco basa per prender decisiuns e mesiras.

Ozendi n'èsi betg pli imaginabel da registrar e da derasar geoinfurmaziuns sin via betg electronica. Il chantun Grischun ha percurschì gia baud l'impurtanza da las geodatas ed ha procurà il matg 1987 per l'installaziun coordinada d'in sistem d'infurmaziun geografica (SIG) en l'administraziun. Dus onns pli tard ha la Regenza approvà l'installaziun d'in center SIG tar l'Uffizi da meglieraziun e mesiraziun. Ils sistems necessaris per registrar las datas èn vegnids amplifitgads en il decurs dals onns confurm als basegns. Oz è il SIG ina part impurtanta da l'infrastructura naziunala da geodatas ed in instrument indispensabel en blers secturs.

Basas legalas per ina vasta utilisaziun
L'october 2007 è vegnida decretada la Lescha federala davart la geoinfurmaziun ed il zercladur 2011 la Lescha chantunala da geoinfurmaziun. Questas duas leschas han l'intent da metter a disposiziun geodatas en moda simpla ed a custs raschunaivels a las autoritads, ma er a l'economia, a la societad ed a la scienza per ina vasta utilisaziun. Las basas giuridicas prevesan ultra da quai in diever gratuit da las geodatas ch'èn accessiblas a la publicitad.

Center da geodatas dal Grischun
Dapi l'onn 2007 maina la GeoGR SA il Center chantunal da geodatas per incumbensa dal chantun. Las geodatas pon vegnir consultadas sut www.geogr.ch e pon vegnir retratgas facilmain e gratuitamain suenter ina registraziun unica. Plinavant stattan a disposiziun a la publicitad ulteriuras chartas interactivas da l'administraziun pertutgant circa 115 temas. Ina survista da las geodatas publitgadas, da las chartas interactivas e dals geoservetschs po vegnir consultada sut geo.gr.ch.

Ulteriur product disponibel
Cun il cataster da las restricziuns da dretg public da la proprietad (cataster RDPP) stat a disposiziun il proxim product a la publicitad da nov sut oereb.geo.gr.ch. Las restricziuns da dretg public da la proprietad, ch'èn cunfinadas territorialmain, vegnan uschia rendidas accessiblas en moda centrala e simpla a la publicitad per mintga bain immobigliar.


Infurmaziuns:
- Daniel Buschauer, manader da l'Uffizi d'agricultura e da geoinfurmaziun, tel. +41 81 257 24 31, e‑mail Daniel.Buschauer@alg.gr.ch
- Donat Rischatsch, manader dal Center da cumpetenza dal SIG, Uffizi d'agricultura e da geoinfurmaziun, tel. +41 81 257 24 70, e‑mail Donat.Rischatsch@alg.gr.ch


Gremi: Uffizi d'agricultura e da geoinfurmaziun
Funtauna: rg Uffizi d'agricultura e da geoinfurmaziun

Neuer Artikel