A chaschun dal giubileum da 50 onns dal dretg da votar da las dunnas sin plaun federal ha il schef dal Departament da finanzas e vischnancas beneventà oz las presidentas communalas en uffizi ad in barat en la sala dal Cussegl grond. 14 dals 101 presidis en il Grischun èn actualmain en ils mauns da dunnas.

Ils 7 da favrer 1971 signifitga ina midada: ils votants svizzers han concedì a la populaziun feminina il dretg da burgaisas cumplainas. Dad ussa davent pon er las dunnas votar sco er exequir il dretg d'eleger activ e passiv sin plaun federal. En il Grischun è vegnì introducì in onn pli tard il dretg da votar e d'eleger correspundent sin plaun chantunal e cirquital. Ulteriurs 11 onns èn anc passads fin che las vischnancas dal Grischun han concedì l'onn 1983 quest dretg a las dunnas er sin plaun communal.

Barat d'experientschas, referats d'impuls ed engraziament
Betg mo en las autoritads chantunalas (Cussegl grond e Regenza) n'è la populaziun feminina sutrepreschentada cleramain, mabain er en las executivas da las vischnancas. Mo var 20 pertschient da tut ils commembers da las executivas (stadi 2019) èn dunnas. Actualmain vegnan las vischnancas dad Arosa, Churwalden, Fideris, Furna, Glion, Malans, Masagn, Panaduz, Puntraschigna, San Vittore, Seewis, Segl, Urmagn e Val Müstair manadas da dunnas. A Masagn, Urmagn e San Vittore han las dunnas actualmain schizunt la maioritad en la suprastanza communala.

A chaschun dal barat ha cusseglier guvernativ Christian Rathgeb engrazià a las presidentas, sco represchentantas da tut las dunnas che s'engaschan en las vischnancas dal Grischun, en num da la Regenza per lur engaschi a favur da la generalitad. Tranter auter èsi vegnì discutà davart dumondas, sco las carrieras politicas, las circumstanzas che han favurisà la carriera respectiva, tge ch'è decisiv per l'elecziun da presidentas communalas futuras e tge che po vegnir fatg concretamain per augmentar la quota da dunnas en las executivas communalas dal Grischun. Il barat d'ideas è vegnì cumplettà cun in referat da la deputada Silvia Hofmann. Ultra da quai è sa preschentada Barbara Wülser, la nova manadra dal Post da stab per l'egualitad da las schanzas. Ella ha infurmà davart il project "PROMO Femina".

Promoziun da dunnas en la politica tras PROMO Femina
Per incumbensa dals Biros d'egualitad dals tschintg chantuns Appenzell Dador, Grischun, Son Gagl, Vallais e Turitg maina la Scola auta spezialisada dal Grischun il project "PROMO Femina" cun la finamira d'augmentar l'engaschament politic da dunnas sin plaun communal. Il resultat dal project duai esser in tool online interactiv per promover las dunnas en la politica communala. Per l'ina duai quel sustegnair las vischnancas, las commembras ed ils commembers da lur autoritads sco er las partidas localas da motivar dunnas per in engaschament politic ed inditgar mesiras concretas. Per l'autra sa drizza l'instrument online directamain a dunnas che vulan s'infurmar davart las pussaivladads e davart las pretensiuns d'in engaschament politic sin plaun communal e che vulan giuditgar lur qualificaziun ed ils proxims pass. Il tool online porscha a las acturas ed als acturs pia in instrument, per pudair prender per mauns e per realisar l'augment da la quota da dunnas en la politica communala. Per incumbensa dal Departament da finanzas e vischnancas vegn il project current cumplettà cun in'analisa da la rait.

Fotografia:

Infurmaziuns:
- cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Barbara Wülser, Post da stab per l'egualitad da las schanzas, tel. +41 81 257 35 71, e-mail Barbara.Wuelser@stagl.gr.ch
- Scola auta spezialisada dal Grischun (SASGR), dr. oec. Curdin Derungs, tel. +41 81 286 24 90, e-mail Curdin.Derungs@fhgr.ch

Gremi: Regenza
Funtauna: rg Uffizi da vischnancas