Il chantun fa emprimas experientschas en connex cun occurrenzas grondas. Durant las proximas emnas vegnan realisadas en differentas regiuns occurrenzas da pilot. Uschia duain occurrenzas cun passa 1000 persunas puspè esser pussaivlas la stad. Occurrenzas grondas èn stadas scumandadas dapi il favrer 2020.
Sco in dals emprims chantuns realisescha il Grischun projects da pilot per far experientschas en connex cun la realisaziun d'occurrenzas grondas en temps da corona. Uschia è il sistem da test Covent gia vegnì applitgà a chaschun da duas radunanzas communalas. Quest sistem da test porscha ina identificaziun da persunas clera e nunfalsifitgabla.
Emprimas occurrenzas da pilot il zercladur 2021 cun fin 1000 persunas
Actualmain èn admessas occurrenzas cun fin 300 persunas (en locals interns cun fin 100 persunas), resguardond la mesa capacitad dals locals. A partir dal 1. da zercladur 2021 admetta la Confederaziun tschintg occurrenzas da pilot cun fin 1000 persunas al liber (600 persunas en locals interns). Questas occurrenzas ston vegnir permessas dals chantuns. Ultra da las duas radunanzas communalas a Sagogn ed a Calanca ha il chantun confermà ussa las suandantas occurrenzas da pilot: Alpen Challenge Lai (13 da zercladur 2021), Calanda Broncos Cuira (13 da zercladur 2021), KHUR.CH (24 fin 26 da zercladur 2021) e Dis da chavals Maiavilla (24 fin 27 da zercladur 2021).
Occurrenzas grondas cun fin 5000 persunas a partir dal 1. da fanadur 2021
Gia il fanadur 2021 duain alura occurrenzas grondas puspè esser pussaivlas cun fin 5000 persunas (cun obligaziun da seser) en il sectur extern e cun 3000 persunas en il sectur intern. Per occurrenzas al liber cun plazzas da star en pe, per exempel per open airs, vegnan permessas maximalmain 3000 persunas, resguardond la mesa capacitad ed observond l'obligaziun da purtar ina mascrina. Access ad occurrenzas grondas survegnan mo persunas ch'èn vaccinadas cumplettamain, ch'èn guaridas da COVID‑19 u che pon preschentar in test negativ. A partir dals 20 d'avust 2021 pon vegnir realisadas occurrenzas grondas cun fin 10 000 persunas.
Agiunta:
Foto 2
Foto © Mattias Nutt
Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Regenza
Funtauna: rg Regenza