La Regenza ha garantì al fond da fundaziun da la famiglia Planta ina contribuziun maximala da 300 000 francs per la restauraziun totala da la Chesa Planta a Zuoz. En il rom da questa mesira da la tgira da monuments duai tranter auter vegnir integrà l'Archiv cultural da l'Engiadin'Ota en quest edifizi. Ils custs totals vegnan calculads cun 5,5 milliuns francs. Amez il vitg da Zuoz, sin la gronda plazza communala, furman la part sura e la part sut da la Chesa Planta in ensemble impressiunant. La part sut da la Chesa Planta è en proprietad dal fond da fundaziun da la famiglia Planta che ha in grond interess che la chasa cun sia posiziun centrala vegnia duvrada per intents publics. En il rom d'ina incumbensa d'ideas e da studis èn vegnidas elavuradas ils onns 2018 e 2019 pussaivladads per furmas d'utilisaziun e da gestiun futuras. L'element central da l'utilisaziun futura vegn ad esser l'integraziun da l'Archiv cultural da l'Engiadin'Ota. Las lavurs da restauraziun ch'èn colliadas cun il project vegnan accumpagnadas e sustegnidas da la Tgira da monuments. En quest connex vegn la chasa er a vegnir messa sut protecziun da monuments.

La Regenza ha approvà ina dumonda da la Scola auta spezialisada dal Grischun (SASGR) per reparar ils tetgs plats e per realisar mesiras da segirezza vi da l'edifizi a Cuira. Ultra da quai conceda ella a la SASGR ina contribuziun chantunala da maximalmain var 222 000 francs per realisar il project. En il rom da la preparaziun per la concurrenza d'architectura per il nov Center da scola auta è l'edifizi a la Pulvermühlestrasse 57 vegnì analisà detagliadamain. En quest connex èsi sa mussà che lavurs urgentamain necessarias da reparaziun e d'adattaziun vi dal tetg plat na pon betg vegnir spustadas fin a la renovaziun totala da l'edifizi che ha lieu probablamain ils onns 2025 fin 2028.

Questas lavurs urgentamain necessarias pertutgan en spezial las fanestras dal tetg plat dal tract da scola. A quest lieu èsi gia vegnì constatà che aua entra en l'edifizi en cas da precipitaziuns, e quai chaschuna donns consecutivs. Per tut la surfatscha dal tetg sco er per il tetg plat dal tract da labor ch'è passabel mo en moda limitada ston ultra da quai vegnir montadas protecziuns cunter crudadas per il mantegniment da l'edifizi.

La Regenza ha approvà il project "Rempar da lavinas Duchli" da la vischnanca da Tavau ed ha deliberà per quest intent ina contribuziun chantunala da maximalmain 832 500 francs.Il rempar da lavinas Duchli protegia il territori d'abitar e da mastergn Duchli, la via chantunala da colliaziun en la val Dischma sco er ina loipa da passlung ed ina via da viandar l'enviern. Il zercladur 2019 è sa distatgada ina bova spontana che ha donnegià parts dal rempar da lavinas. Quel è però vegnì reparà gia ils onns 2019 e 2020. Sin la surfatscha d'erosiun resp. da sbuvada na pon però vegnir construids pli nagins rempars. Pervia da quai ha la vischnanca da Tavau laschà examinar la situaziun da lavinas ch'è resultada da nov.

La finamira dal project qua avant maun "Rempar da lavinas Duchli" è quel da cuntanscher ina protecziun dal territori d'abitadi e la segirezza da las utilisadras e dals utilisaders da la via chantunala sco ch'ellas eran avant la bova. Per quest intent duai il rempar existent Duchli vegnir cumplettà cun 126 meters raits da naiv e cun 96 meters rempars da sustegn fixs. En las regiuns pli bassas a l'ur dal guaud èsi previs da construir in rempar da lavinas temporar en cumbinaziun cun ina plantaziun da bostgs.

Il project "Protecziun cunter crudada da crappa Alvagni Bogn" da la Viafier retica (VR) è vegnì approvà da la Regenza inclusiv las mesiras immediatas ch'èn gia vegnidas prendidas. Ultra da quai ha ella garantì a la VR ina contribuziun chantunala da maximalmain 461 000 francs als custs totals da 615 000 francs. Il project è necessari perquai ch'i sa distatga adina puspè crappa da la paraid da grip Crap da Lavarettas che sa chatta sur la lingia da l'Alvra da la VR en vischinanza dad Alvagni Bogn. Periclitada è en emprima lingia la lingia da viafier, en cas d'eveniments da crudada pli gronds però er ina part dal territori d'abitadi dad Alvagni Bogn.

Pervia da la periclitaziun giuditgada sco acuta da la lingia da viafier e dals edifizis che sa chattan sut tala è vegnida construida l'atun 2019 ina rait cunter crudada da crappa d'ina lunghezza da 60 meters sco mesira immediata sut la partida da spelm luc. Per segirar a lunga vista la lingia da viafier en il sectur dal Crap da Lavarettas duain ussa – en il rom dal project – vegnir construidas tut en tut trais raits cunter crudada da crappa che han ina lunghezza totala da 150 meters. Ultra da quai è previsa ina segirada dal spelm permanenta cun 16 ancras per fixar il corp da spelm instabil.