Navigation

Inhaltsbereich

  • Erste Mitteilung
  • Neuen Beitrag einfügen

La Regenza vul rinforzar la Cassa da pensiun dal Grischun e pussibilitar prestaziuns cumpetitivas. Per quest intent duain las contribuziuns da spargn da las persunas assicuradas vegnir augmentadas. Cun quai ha la Regenza er reagì sin ils basegns da differents patruns affiliads che pretendan ch'il plan da provediment existent vegnia adattà.

Ils elements centrals per fixar las rentas èn sa midads fermamain ils ultims onns. Il nivel dals tschains è extremamain bass e l'aspectativa da vita crescha d'in cuntin. Tuts dus svilups engrevgeschan fermamain las cassas da pensiun, uschia er la Cassa da pensiun dal Grischun (CPGR). La CPGR è l'instituziun da provediment da bleras patrunas e blers patruns da dretg public en il chantun Grischun sco er da lur persunas emploiadas. Tar las 147 patrunas e patruns affiliads tutgan il chantun Grischun e sias instituziuns autonomas da dretg public, 71 vischnancas grischunas, autras corporaziuns da dretg public sco er instituziuns da dretg privat ch'adempleschan oravant tut incumbensas publicas. Cun 12 450 persunas assicuradas activas e persunas che retiran rentas e cun in chapital da provediment da 3,3 milliardas francs è la CPGR la cassa da pensiun la pli gronda en il Grischun.

Finanziar prestaziuns cumpetitivas
Fin l'onn 2005 sa chattava la tariffa da conversiun da la CPGR – vul dir la procentuala dal chapital spargnà che vegn pajà ora a las persunas pensiunadas mintga onn sco renta – tar 7,2 pertschient. Dapi lura ha la tariffa stuì vegnir reducida cuntinuadamain, quai che chaschuna rentas pli bassas. La cumissiun administrativa da la CPGR ha concludì l'ultima giada l'onn 2015 ina reducziun a partir da l'onn 2017 che dura fin l'onn 2024. Durant quest temp sa reducescha la tariffa da conversiun reglamentara da 6,55 pertschient cuntinuadamain a 5,49 pertschient. I sa mussa che quest plan da sbassada dura memia ditg ed è insuffizient. Senza mesiras accumpagnantas vegnan las rentas futuras a sa reducir vinavant. Per pussibilitar prestaziuns cumpetitivas propona la Regenza – tras ina midada da la Lescha davart la Cassa da pensiun – ina finanziaziun pli ferma cun agid da contribuziuns da spargn pli autas. Cun adattar la deducziun da coordinaziun duai plinavant vegnir meglierà fermamain il provediment professiunal da persunas che lavuran a temp parzial.

Resguardà ils resultats da la consultaziun
La consultaziun realisada l'atun 2020 ha confermà il basegn d'agir. Sin basa dals resultats da la consultaziun ha la Regenza adattà la graduaziun da las contribuziuns e la deducziun da coordinaziun. Ella desista da la contribuziun chantunala unica che dueva finanziar la soluziun transitorica. Plinavant duai il chantun prestar ina garanzia per las rentas currentas dals 31 da december 2021. Las persunas che retiran rentas ils 31 da december 2021 pon uschia vegnir manadas en ina instituziun da provediment serrada. Cun in grad da cuvrida da 110 pertschient è la CPGR actualmain posiziunada bain e finanziada solidamain. La stabilitad futura da la cassa po anc vegnir augmentada grazia a l'instituziun da provediment per las persunas pensiunadas.

Puncts centrals dal project
Il process da spargn rinforzà e la garanzia dal chantun per las rentas currentas èn ils elements centrals dal project. Plinavant vegnan adattadas las modalitads dal pensiunament anticipà. En vista a la situaziun demografica midada ed a la mancanza da persunas spezialisadas na duai il pensiunament anticipà betg pli vegnir promovì en l'avegnir en la medema dimensiun sco fin ussa.

Consequenzas finanzialas
Per il chantun sco patrun importan las contribuziuns da spargn pli autas 7,98 milliuns francs per onn. Ellas èn 1 milliun francs pli bassas ch'en la proposta da consultaziun. Las contribuziuns supplementaras da las lavurantas e dals lavurants importan 7,41 milliuns francs per onn. La Regenza ha l'intenziun d'adattar las regulaziuns concernent il pensiunament anticipà e da spargnar a vista mesauna var 1,5 milliuns francs. Ils custs supplementars annuals per il chantun sco patrun importan netto var 6,5 milliuns francs.

La tractativa dal project en il Cussegl grond è previsa per la sessiun d'avust 2021. La revisiun parziala da la Lescha davart la Cassa da pensiun dal Grischun duai entrar en vigur il 1. da schaner 2022.

Agiunta:
missiva


Infurmaziuns:
cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch


Gremi: Regenza
Funtauna: rg Chanzlia chantunala

Neuer Artikel