Per incumbensa da la Regenza ha il Departament Istorgia da l'Universitad da Basilea elavurà en in studi cumplessiv l'istorgia da la psichiatria en il chantun Grischun dal cumenzament en il 19. tschientaner fin a l'ultim passà. Durant il 20. tschientaner è la psichiatria grischuna stada in da plirs centers per perscrutaziuns ereditar-biologicas en Svizra.
La rolla da l'istorgia da la psichiatria grischuna vegn adina puspè tematisada. La discussiun è però vegnida difficultada dal fatg che retschertgas fundadas da l'istorgia da la psichiatria mancavan. Pervia da quai ha la Regenza decidì avant var 3 onns da laschar elavurar scientificamain l'istorgia da la psichiatria dal chantun Grischun tras il Departament Istorgia da l'Universitad da Basilea. Il studi avant maun porscha ussa in fundament per s'occupar da l'istorgia da la psichiatria dal chantun sin basa dals fatgs. Ultra da quai serva el sco basa d'infurmaziun per l'orientaziun actuala e futura da la psichiatria dal Grischun.
Mesiras repressivas per motivs da provediment han caracterisà la psichiatria dal Grischun
La psichiatria dal Grischun vegn adina puspè tematisada en connex cun las mesiras repressivas per motivs da provediment e cun ils experiments da medicaments. Tenor il studi èn – fin l'onn 1980 – in terz fin la mesadad da las entradas en la psichiatria stadas entradas sfurzadas. Mesiras repressivas per motivs da provediment pertutgavan savens cas d'abus d'alcohol e da drogas, pli tard er periclitaziuns tras sasez. Pervia da l'institut multifuncziunal a Realta existiva en il Grischun ina relaziun instituziunalisada e pervia da quai spezialmain stretga tranter las mesiras repressivas e la psichiatria. Experiments cun medicaments betg admess hai dà mo en cas singuls. Tenor ils auturs dal studi na giugava la psichiatria dal grischun betg ina rolla prominenta per perscrutar novs psicofarmacums.
Center per perscrutaziun e svilup ereditar-biologic
Durant il 20. tschientaner è la psichiatria grischuna stada in da plirs centers per perscrutaziuns ereditar-biologicas en Svizra. Tar ils champs da perscrutaziun correspundents tutgavan tranter auter la perscrutaziun genealogica e l'installaziun d'in uschenumnà archiv da famiglia. Er èn las clinicas grischunas s'engaschadas fermamain per sviluppar e per applitgar novas terapias, sco per exempel curas d'insulin e terapias d'electroschoc.
Fasa da refurmas persistentas durant ils onns 1960
A partir dals onns 1960 han gì lieu en las clinicas grischunas refurmas persistentas sin plaun organisatoric sco er sin plaun da las purschidas. I èn vegnidas sviluppadas partiziuns spezialisadas cun purschidas per differentas gruppas da pazients sco uffants e giuvenils, umans cun impediments u pazientas e pazients pli vegls. Dapi ils onns 1970 èn ultra da quai vegnidas rinforzadas fermamain las purschidas ambulantas e parzialmain staziunaras da la psichiatria dal Grischun. La midada psicofarmacologica haja creà la pussaivladad da tractar umans cun disturbis psichics er ordaifer la clinica. Uschia sajan las clinicas daventadas adina pli savens ils lieus d'intervenziuns en cas da crisas acutas.
Agiuntas:
Studi da l'istorgia da la psichiatria dal Grischun
Resumaziun dal studi
Fegl sgulant davart il studi
Preschentaziun
Fotografia agiuntada:
Cartulina cun la vista exteriura da l'institut psichiatric Waldhaus Text: «M[eine] liebe M. Will dir nur noch berichten, das ich warscheinlich erst am Sontag über acht Tage komme, Gruss Lisi.»
©Archiv administrativ Waldhaus
Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
- prof. Martin Lengwiler, Departament Istorgia da l'Universitad da Basilea, tel. +41 77 206 84 78, e-mail Martin.Lengwiler@unibas.ch
Gremi: Departament da giustia, segirezza e sanadad
Funtauna: Uffizi da sanadad