Las lavurs da planisaziun per sanar la plazza d'armas a Cuira cunter la canera han cumenzà. Medemamain ha l'Armada gia realisà emprimas mesiras per reducir la canera. Il Departament federal da defensiun, protecziun da la populaziun e sport (DDPS) ha infurmà la gruppa accumpagnanta ch'è vegnida nominada il december 2020 davart il stadi da las lavurs da sanaziun cunter la canera.
L'Ordinaziun davart la protecziun cunter canera definescha limitas per plazzas d'armas e da tir militaras. Sin la plazza d'armas a Cuira cun la plazza da tir Rossboden/Rheinsand na vegnan questas limitas actualmain probablamain betg observadas. Sin giavisch dal chantun Grischun, da la citad da Cuira e da la vischnanca da Favugn ha il DDPS cumenzà cun las lavurs da sanaziun cunter la canera gia la fin da l'onn 2020.
Responsabel per la planisaziun e per la realisaziun da la sanaziun cunter la canera è armasuisse ensemen cun l'Armada. Eventualas mesiras da sanaziun architectonicas ed eventualas permissiuns excepziunalas per surpassar las limitas vegnan exponidas publicamain en il rom d'ina procedura militara d'approvaziun dals plans avant la realisaziun.
Infurmà la gruppa accumpagnanta davart mesiras planisadas e davart progress
A chaschun da l'emprima sesida da la gruppa accumpagnanta èn il cusseglier guvernativ Jon Domenic Parolini, il president da la citad da Cuira Urs Marti, il president communal da Favugn Peter Camastral sco er ulteriuras represchentantas ed ulteriurs represchentants dal chantun Grischun e dal DDPS vegnids infurmads davart il stadi da las lavurs da sanaziun da la plazza da tir Rossboden cunter la canera. La gruppa accumpagnanta è d'accord che la sanaziun da la plazza d'armas a Cuira cunter la canera duaja vegnir realisada sche pussaivel avant l'onn 2025 e che las limitas da l'Ordinaziun davart la protecziun cunter canera stoppian vegnir observadas. En cas excepziunals po il DDPS permetter surpassaments da las limitas. Tenor l'avis da la gruppa accumpagnanta duai però vegnir desistì da quai tant sco pussaivel.
La stad 2021 vegn la gruppa accumpagnanta infurmada davart ils resultats da las mesiraziuns e da las calculaziuns da la canera. Alura vegnan fixadas las mesiras per observar las limitas. La gruppa accumpagnanta ha alura danovamain la pussaivladad da s'engaschar en chaussa.
L'Armada ha realisà emprimas mesiras per reducir la canera
Per reducir uschè svelt sco pussaivel la canera per las abitantas ed ils abitants dals quartiers pertutgads, ha l'Armada gia realisà emprimas mesiras da meglieraziun: ella desista per gronda part da tirs suenter las 22.00, reducescha la dimensiun da la chargia en la scolaziun da siglientar e dischlochescha il tir cun bittaminas sin las plazzas da tir a Valragn ed a Wichlen.
Fotografia agiuntada:
©VBS/DDPS
Infurmaziuns:
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch
- Florian Waldner, Communicaziun armasuisse Immobiglias, tel. +41 58 481 79 28
Responsabladad: Departament d'educaziun, cultura e protecziun da l'ambient