La cooperaziun publica tar il program d'aglomeraziun il pli giuven è terminada. Il program mussa il svilup che vegn prendì en mira a lunga vista per l'abitadi, per la cuntrada e per il sistem da traffic, ed el cuntegna numerusas mesiras per cuntanscher las finamiras formuladas. L'interess per el en il rom da la cooperaziun è stà grond.
Dapi var dus onns vegn elavurà il nov program d'aglomeraziun da la 4. generaziun sut l'egida da l'Uffizi per il svilup dal territori. Las regiuns Plaun, Plessur e Landquart, sco er lur vischnancas èn involvidas e coopereschan al program. Per integrar la vasta populaziun ha gì lieu la cooperaziun publica dals 13. d'avrigl fin ils 12 da matg 2021. Durant quest temp èn vegnidas inoltradas 28 posiziuns d'organisaziuns, da partidas, da regiuns vischinas, d'interpresas e da persunas privatas.
Ils resuns ils pli impurtants
In pèr participantas e participants han ludà l'elavuraziun stringenta dal basegn d'agir, las numerusas mesiras per las pedunas ed ils peduns e per las ciclistas ed ils ciclists sco er las mesiras previsas sin il champ da l'organisaziun e da la cussegliaziun per influenzar il cumportament da mobilitad.
Autras parts han crititgà che temas sco la biodiversitad, la midada dal clima e la protecziun dal clima sajan vegnids tractads memia pauc. Ed igl è er vegnì renvià al fatg che las consequenzas urbanisticas da la densificaziun stoppian vegnir resguardadas pli fitg. Azonaziuns u enzonaziuns duessan vegnir fatgas pir, suenter che las reservas da las zonas da construcziun sajan exauridas. Er la tscherna dal scenari "aut" per la creschientscha da la populaziun è vegnida crititgada. Ulteriuras remartgas èn vegnidas inoltradas tar differentas mesiras dal traffic da pedunas e pedunas e da ciclistas e ciclists sco er tar singuls projects da la construcziun da vias.
Tractament dals giavischs
La gronda parts dals giavischs concernan las planisaziuns dal chantun, da las regiuns e da las vischnancas e betg l'instrument dal program d'aglomeraziun. Quests giavischs èn vegnids tramess als posts responsabels dal chantun, da las regiuns e da las vischnancas, per che quels als examineschian ed als possian resguardar sche pussaivel en lur planisaziuns. Latiers tutgan per exempel la coordinaziun giavischada cun la strategia da biodiversitad sin plaun chantunal, giavischs tar las consequenzas urbanisticas da la densificaziun u singulas mesiras sin plaun communal.
In pèr giavischs vegnan examinads en il rom da l'ulteriura approfundaziun tras ils purtaders da mesiras e resguardads sche pussaivel en l'ulteriura planisaziun e projectaziun. Quai pertutga differents resuns tar las mesiras concernent il traffic da pedunas e peduns e dal traffic da velos, ma er tar ulteriuras mesiras dal traffic sin via.
Ils resuns che vegnan resguardads en il program d'aglomeraziun èn per exempel las optimaziuns tar la descripziun da singulas mesiras sco er ina integraziun pli ferma da la biodiversitad tar las mesiras.
In pèr giavischs pertutgan prescripziuns che na pon betg vegnir midadas tras il program d'aglomeraziun. Uschia è per exempel il scenari per la creschientscha da la populaziun fixà en il Plan directiv chantunal e na po betg vegnir midà sur il program d'aglomeraziun (concordanzas da las planisaziuns).
Ulteriur proceder
Las regiuns, las vischnancas ed ils uffizis chantunals survegnan ils resuns ch'èn relevants per lur ulteriura lavur. La fasa da prender il conclus tras las vischnancas e tras las regiuns curra. Il chantun prepara ses conclus il fanadur / l'avust. Sa basond sin ils conclus vegn il program inoltrà fin il pli tard ils 15 da settember 2021.
L'evaluaziun dals detagls tar la cooperaziun publica sco er il program d'aglomeraziun vegnan publitgads sin la pagina d'internet da l'Uffizi per il svilup dal territori suenter ch'ils conclus èn vegnids prendids.
Infurmaziuns:
dr. Boris Spycher, manader da project / collavuratur scientific, Uffizi per il svilup dal territori, tel. +41 81 257 23 06, e-mail Boris.Spycher@are.gr.ch
Responsabladad: Uffizi per il svilup dal territori