25 onns Post da stab per l'egualitad da las schanzas en il Grischun, 50 onns dretg da votar da las dunnas en Svizra – per quest motiv envida la Biblioteca gender en la Biblioteca da la citad da Cuira a sia avertura. Var 150 cudeschs davart dumondas da gender e d'egualitad stattan a disposiziun. La Biblioteca gender vegn averta cun ina discussiun al podium pertutgant la participaziun politica da las dunnas en il Grischun.

La Biblioteca dal Post da stab per l'egualitad da las schanzas ha in inventari da circa 1200 cudeschs. La purschida è multifara e cumpiglia blers aspects da las dumondas da gender, da las identitads da schlattaina, da las furmas da famiglia, da la cumpatibilitad da la professiun cun la vita privata, da l'egualitad da las schanzas e da discriminaziuns. Ultra da litteratura spezialisada datti er cudeschs levamain chapibels e romans sin la curuna. Per render quels attractivs per in vast public cooperescha il Post da stab cun la Biblioteca da la citad da Cuira. En la Biblioteca gender ch'è vegnida creada da nov a la Grabenstrasse 28 vegn rendida accessibla ina tscherna da var 150 cudeschs al public da la Biblioteca da la citad da Cuira. L'entir inventari da la Biblioteca dal Post da stab pon ins emprestar vinavant gratuitamain tar il Post da stab.

Occurrenzas cuminaivlas davart il tema gender
En l'avegnir vegnan organisadas regularmain occurrenzas cuminaivlas davart il tema gender. La Biblioteca gender vegn averta ils 24 d'avust 2021 cun ina discussiun al podium pertutgant la participaziun politica da las dunnas en il Grischun. Quai va bain a prà cun il giubileum da 50 onns dal dretg da votar da las dunnas. Co era il stadi d'anim quella giada en il Grischun? Tgeninas protagonistas e tge pass ha l'egualitad da las schanzas effectuà tar la participaziun politica? Co èsi oz cun la participaziun politica da las dunnas en il Grischun? Ina istoricra, ina deputada ed ina studenta dilucideschan questas dumondas. Cumplettada vegn l'occurrenza cun in aperitiv per il giubileum da 25 onns Post da stab per l'egualitad da las schanzas.

Vernissascha, ils 24 d'avust 2021, a las 19.00, Biblioteca da la citad da Cuira

• Titel: «50 onns dretg da votar da las dunnas – participaziun politica da las dunnas en il Grischun quella giada ed oz»
• Bainvegni: Julia Wäger, manadra da la Biblioteca da la citad da Cuira, e Barbara Wülser, manadra dal Post da stab per l'egualitad da las schanzas dal Grischun
• Discussiun al podium cun
  - Aita Zanetti, vicepresidenta dal Cussegl grond, commerzianta, mamma, pura
  - dr. phil. Silke Redolfi, istoricra, manadra da l'Archiv grischun per la cultura da las dunnas
  - Janina Rageth, studenta, autura da www.frauenstimmrechtgr.ch
• Moderaziun: Nicolas Zogg, Post da stab per l'egualitad da las schanzas
• Suenter in aperitiv. Entrada gratuita. Annunzia per telefon giavischada a: www.bibliochur.ch

Il Post da stab per l'egualitad da las schanzas e la Biblioteca da la citad da Cuira sa legran da Vossa cumparsa!

Agiunta:

flyer

Infurmaziuns:

- Nicolas Zogg, manader da project, Post da stab per l'egualitad da las schanza, tel. +41 81 257 35 73, e-mail Nicolas.Zogg@stagl.gr.ch
- Barbara Wülser, manadra dal Post da stab per l'egualitad da las schanzas, tel. +41 81 257 35 71, e-mail Barbara.Wuelser@stagl.gr.ch
- Julia Wäger, manadra da la Biblioteca da la citad da Cuira, tel. +41 81 254 50 10, e-mail Julia.Waeger@bibliochur.ch

Responsabladad: Post da stab per l'egualitad da las schanzas