Il bindel è taglià: il president da la Regenza Mario Cavigelli e cusseglier guvernativ Marcus Caduff avran uffizialmain la chasa da scola renovada Plantahof a Landquart. L'infrastructura da scola moderna ha ina gronda impurtanza per l'agricultura en il Grischun.

Sco center da cumpetenza per l'agricultura ha il Plantahof a Landquart ina posiziun predominanta en la Svizra tudestga e sco instituziun da furmaziun e da cussegliaziun è el d'impurtanza surregiunala. L'areal dal Plantahof è creschì durant blers decennis e cumpiglia oz circa 20 edifizis. Ultra dals svilups organisatorics e da manaschi ston ils edifizis vegnir renovads permanentamain e vegnir adattads a las novas pretensiuns. Uschia è la chasa da scola vegnida renovada ils ultims dus onns ed entaifer il credit d'impegn da 13,4 milliuns francs.

En nova splendur
Suenter passa 50 onns d'utilisaziun ha mussà la substanza architectonica existenta in basegn da renovaziun correspundentamain grond. Il project general ha cumpiglià la renovaziun dals mirs exteriurs da l'edifizi sco er da las construcziuns internas, il remplazzament da la tecnica da chasa e la realisaziun da las pretensiuns legalas actualas. Central per l'incumbensa architectonica eran l'occupaziun ed il tractament da l'edifizi existent. Las intervenziuns architectonicas èn vegnidas realisadas tut tenor las substanzas architectonicas existentas e van per part giu fin a la construcziun brutta. Sin basa da las mesiras prendidas cun precauziun èsi stà pussaivel da mantegnair e da cumplementar las structuras da l'effectiv. Las qualitads da l'edifizi vegl èn vegnidas rinforzadas ed el sa mussa en nova splendur. Las localitads da scola revalitadas e la purschida da localitads specificas che resulta da quai porscha al Plantahof ed a sias scolaras ed a ses scolars ina gronda plivalur.

Design vi da l'edifizi
En ils corridors clers è plazzà sin mintga plaun in bigl da baiver. Ils trais bigls èn vegnids sviluppads e realisads da differents auturs. Ultra da l'element aua steva en il center la colliaziun da design e da mastergn da las lavurs artisanalas. Per l'ina tematiseschan els in tractament persistent cun la resursa aua e per l'autra servan els a las scolaras ed als scolars sco bigl da baiver cun aua da funtauna grischuna locala.

Infrastructura orientada al futur
Cun la renovaziun vegn garantì il diever da l'infrastructura per il proxim ciclus da vita da l'edifizi. L'object è energeticamain sco tecnicamain puspè sin il stadi il pli actual e correspunda a las normas ed als basegns actuals. Ils trais access generus ed in ascensur situà centralmain garanteschan ch'ils locals da scola èn cuntanschibels senza barrieras ed èn per il Plantahof ina facilitaziun da manaschi considerabla. Las stanzas da scola èn concepidas en moda favuraivla a l'emprender, ventiladas activamain ed equipadas cun ina tecnica da medias moderna. I stattan plinavant a disposiziun stanzas da scola per lavurs da team, in studio da cuschina cun local da teoria per l'instrucziun d'economia e locals da lavur per la scolaziun pratica. La nova infrastructura al Plantahof permetta perspectivas attractivas en la scolaziun ed en la furmaziun supplementara da la generaziun giuvna da puras e purs.

Fotografias agiuntadas:

© Ingo Rasp, Cuira

Infurmaziuns:

- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch

- Markus Dünner, architect chantunal, Uffizi da construcziun auta, tel. +41 81 257 36 31, e‑mail Markus.Duenner@hba.gr.ch

Responsabladad: Uffizi da construcziun auta