Suenter ch'i èn vegnids fatgs glindesdi tests en la scola da Malans, ha l'Uffizi da sanadad ussa ils resultats da quests tests. Il dumber da cas positivs da COVID-19 è actualmain tar 50 (46 da quels èn uffants dal stgalim primar). Tschintg resultats èn anc pendents. En quarantina sa chattan actualmain 34 persunas. Tut en tut èn vegnidas testadas 230 persunas a la scola da Malans. Ensemen cun las autoritads da scola da Malans e cun il Stab directiv communal ha l'Uffizi da sanadad decidì da cuntinuar cun l'instrucziun a distanza en la scola primara ed en la scolina fin e cun mardi, ils 31 d'avust 2021.
Ils cas sa concentreschan sin differentas classas dal stgalim primar. Pervia da quai po l'instrucziun sin il stgalim superiur puspè vegnir cuntinuada cun mascrina a partir da damaun mesemna. La gievgia vegnan ils giuvenils dal stgalim superiur testads in per in en il rom dals tests regulars en la scola. Tut la scola vegn testada danovamain glindesdi, ils 30 d'avust.
Tenor las datas ch'èn fin ussa avant maun, n'ha l'erupziun betg cumenzà en la scola da Malans. Pervia da la situaziun epidemiologica malsegira appellescha l'Uffizi da sanadad, da sa laschar testar immediatamain, sche sintoms sa mussan e da realisar consequentamain las reglas da distanza e d'igiena (purtar la mascrina).
L'augment dals cas è vegnì constatà en ils conturns da la scola da Malans en il decurs da l'emna passada. Sin quai èn la gievgia ed ier vegnids testads tut las scolaras e tut ils scolars sco er tut las persunas d'instrucziun da la scola. Pervia dal dumber da cas che s'augmenta fermamain en la populaziun totala, stoi vegnir fatg quint cun dapli cas da COVID-19 er en las scolas. Las mesiras necessarias vegnan relaschadas da l'Uffizi da sanadad en collavuraziun cun las autoritads da scola, e quai en dependenza da la situaziun.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Responsabladad: Uffizi da sanadad