Sin in'alp da la Muntogna da Schons hai dà dus inscunters privlus tranter la pastra e lufs. L'Uffizi da chatscha e pestga (UCP) ha ussa fatg ina dumonda a l'Uffizi federal d'ambient (UFAM) per regular il triep dal Beverin. Damai che er il bab luf demussa adina puspè in cumportament fitg problematic, ha il UCP dumandà dad er pudair sajettar quest animal genitur problematic.
Sin in'alp da la Muntogna da Schons hai dà dacurt dus inscunters privlus tranter la pastra e lufs. A chaschun da l'emprim inscunter era la pastra sin via cun ses chaun pastur per recognoscar ina pastgira, cur ch'ella è vegnida surprendida d'in luf sin ina distanza da circa 10 meters davos ella. Il luf marmugnava. La pastra è sa cumportada confurm a las recumandaziuns dal UCP ed è sa rendida attenta cun canera. L'animal selvadi è alura s'allontanà. In'emna suenter quest incident era la pastra puspè en il medem territori da l'alp, cur ch'ella è vegnida surprendida da trais lufs. Els han attatgà il chaun pastur ed èn s'allontanads danovamain pir, cur che la pastra è sa rendida attenta cun vusch decidida. Il medem di pli tard han la pastra e dus purs observà ord distanza almain sis chagniels e tschintg lufs creschids al lieu da l'inscunter. Damai ch'ils incidents èn capitads en il territori da chatscha dal triep dal Beverin, ston ins partir dal fatg ch'i sa tracta da lufs dal triep dal Beverin, ch'è puspè sa reproducì quest onn. La populaziun a la Muntogna da Schons fa gronds quitads per la segirezza dals umans e dals animals.
Inoltrà ina dumonda per regular il triep da lufs
Tenor la valitaziun da la surveglianza chantunala da chatscha sa tracti da duas preschentaziuns plausiblas d'in cumportament fitg problematic da lufs, che ha il potenzial da periclitar umans tenor la definiziun dal concept Luf en Svizra. Pervia da quests dus eveniments cun cumportament agressiv da lufs ha il UCP ussa inoltrà al UFAM ina dumonda per ina permissiun per regular il triep dal Beverin. Ultra da quai è cuntanschida er la limita dal dumber d'animals da niz stgarpads en muntaneras da nursas e da chauras protegidas en moda adattada en il territori da chatscha dal triep dal Beverin. Er pervia da quest ulteriur motiv è admessa – tenor la dumonda dal UCP – ina permissiun dal UFAM per regular il triep da lufs. Vitiers vegn ch'il bab luf dal triep dal Beverin ha gia mussà pliras giadas in cumportament problematic. Pervia da quai vegn dumandada a medem temp la permissiun per sajettar er quest animal genitur. Ins sto partir dal fatg che quest triep è eventualmain er anc responsabel per ils trais asens ed ils dus arments ch'èn vegnids blessads durant questa stagiun d'alp.
Svilup actual preoccupant dal cumportament dals lufs
Las autoritads cumpetentas dal chantun constateschan plain quitads ch'ils lufs entran pli savens er en muntaneras d'animals da la spezia dals arments e dals chavals e ch'els blessan per part fermamain er là animals. En cumparegliaziun cun il svilup da la periclitaziun e dals donns da nursas e da chauras correspunda quai ad ina nova dimensiun d'intervenziun pli ferma. Plinavant hai dà durant las ultimas emnas per l'emprima giada er inscunters privlus tranter umans e lufs. Il svilup dals eveniments cun lufs da different gener demussa che las basas legalas en ils secturs da la protecziun da muntaneras e dal management da lufs èn adina en retard envers il svilup fitg svelt en connex cun ils lufs. Las autoritads cumpetentas dal chantun supplitgeschan la Confederaziun energicamain da flexibilisar tant pli svelt ed en moda efficazia las prescripziuns respectivas per sajettar lufs en cas grevs, sco per exempel sche umans èn periclitads.
Infurmaziuns concernent animals da rapina gronds:
dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e-mail Adrian.Arquint@ajf.gr.ch (cuntanschibel per telefon da las 08.00 fin las 09.00 e da las 12.30 fin las 13.30)
Infurmaziuns corporaziun d'alp:
Peter Küchler, directur dal Plantahof, tel. +41 81 257 60 01, e-mail Peter.Kuechler@plantahof.gr.ch (cuntanschibel per telefon da las 12.00 fin las 13.30)
Responsabladad: Uffizi da chatscha e pestga