Sin la Steileralp sur Sufers hai dà ils 27 d'avust 2021 in inscunter tranter turists e plirs lufs. Ils lufs èn s'avischinads sin curta distanza als viandants.

Sin ina spassegiada sin la Steileralp sur Sufers hai dà in inscunter tranter ina gruppa da viandantas e viandants e dus lufs creschids. Ils dus animals èn s'avischinads als turists per in curt temp sin ina distanza da circa 10 meters. Curt suenter ha la gruppa inscuntrà quatter ulteriurs lufs. Quai eran probablamain lufs giuvens. Ils animals giuvens èn suandads la gruppa da viandantas e viandants. Pir suenter stentas repetidas da la gruppa da stgatschar ils animals giuvens, èn quels sa vulvids e sa rendids tar ils animals creschids. Ils lufs èn dentant restads anc durant in temp pli lung en la vischinanza dals turists. Ils animals inscuntrads èn cun gronda probabilitad animals dal triep dal Beverin.

Reglas da cumportament per inscunters cun lufs
Lufs che creschan si e che vivan en l'ambient natiral n'èn da princip betg privlus ed eviteschan per regla il contact cun umans. Ina situaziun privlusa poi dar, sch'ils lufs sa disan vi da l'uman e sch'els cumbineschan schizunt sia preschientscha cun survegnir pavel. Sch'ins inscuntra in luf, duess ins sa cumportar confurm a las recumandaziuns da l'Uffizi da chatscha e pestga.

Infurmaziuns

dr. Adrian Arquint, manader da l'Uffizi da chatscha e pestga, tel. +41 81 257 38 92 (cuntanschibel per telefon tranter las 13.30 e las 14.30), e‑mail Adrian.Arquint@ajf.gr.ch