Ils 31 da december 2020 dumbrava il chantun Grischun 200 096 abitantas ed abitants permanents, quai èn 1075 persunas dapli che l'onn precedent. En il chantun èn vegnids registrads in zic dapli mortoris ch'ils onns precedents.
L'augment da la populaziun en il Grischun sa chatta l'onn 2020 cun 0,54 pertschient sut la media naziunala (0,75 pertschient). La rata da creschientscha la pli gronda han registrà ils chantuns Turgovia, Vad, Argovia e Friburg durant l'onn da rapport. Da l'autra vart han ils chantuns Neuchâtel, Appenzell Dador e Tessin registrà in regress da la populaziun permanenta durant la medema perioda. En grondas parts da la Svizra è il saldo da migraziun internaziunal puspè il motiv principal per l'augment da la populaziun l'onn 2020. Durant l'onn da rapport èn immigradas en Svizra tut en tut 53 804 persunas dapli che emigradas.
Tendenzas regiunalas differentas
Il pli fitg è creschida la populaziun l'onn 2020 en las regiuns grischunas Alvra, Moesa e Plaun. En quest connex è sa concentrada la creschientscha oravant tut sin las axas principalas da la Val dal Rain Grischuna e da la Mesolcina sco er sin ils territoris che cunfineschan cun las vischnancas turisticas centralas. En las regiuns Bernina ed Engiadina Bassa/Val Müstair è la populaziun permanenta sa reducida l'onn passà. Exprimì en cifras absolutas han las regiuns Plessur (plus 376 persunas) e Plaun (plus 207 persunas) registrà l'augment il pli grond da la populaziun residenta.
Abitantas ed abitants permanents da las regiuns en il Grischun: midadas procentualas da l'onn 2020 e dumber per ils 31 da december 2020
In sguard sin las 15 vischnancas cun dapli che 3000 abitantas ed abitants mussa che Tusaun, San Murezzan e Cuira èn creschids il pli fitg l'onn passà. Entaifer questa gruppa da las vischnancas grischunas las pli grondas han Puschlav, Claustra, Landquart e Tavau registrà in regress da la populaziun.
Dapli mortoris tar in dumber da naschientschas tuttina grond
Il surpli da naschientschas è sa preschentà en il Grischun puspè en moda negativa er per l'onn passà. Tar in dumber sumegliant da naschientschas èn ils mortoris s'augmentads levamain durant l'onn da pandemia. Unicamain en las regiuns Plaun, Landquart e Viamala èn vegnidas registradas dapli naschientschas che mortoris, quai cuntrari a la regiun Surselva che demussa la bilantscha negativa la pli gronda tar il moviment natiral da la populaziun.
La quota da la populaziun estra en il Grischun è puspè s'augmentada l'onn 2020. Qua ha il saldo da migraziun internaziunal da la populaziun permanenta grischuna importà l'onn passà tut en tut 1449 persunas. Per la fin da december 2020 avevan pia 19 pertschient da la populaziun grischuna ina naziunalitad estra.
Auter sa preschenta la situaziun tar la migraziun interchantunala: dapli persunas èn emigradas en auters chantuns che immigradas da nov en il Grischun. Giuvnas grischunas e giuvens Grischuns en scolaziun sco er persunas en giuvens onns da professiun emigreschan il pli savens. Las gruppas da la populaziun che vegn bainbaud pensiunada furman da l'autra vart la part la pli gronda da l'immigraziun interchantunala en il Grischun.
Da las vischnancas grischunas profitan Cuira, Glion ed ina gronda part da la Val dal Rain sco er dal Signuradi d'immigraziuns or da las regiuns perifericas ed or da las vischnancas turisticas. Oravant tut Tavau, Arosa e Laax demussan en cifras absolutas l'emigraziun intrachantunala la pli gronda.
Cumponentas dal svilup da la populaziun en las regiuns dal Grischun 2020
Main burgaisas e burgais portugais e serbs, dapli burgaisas e burgais tudestgs e talians en il Grischun
Per la fin da l'onn 2020 abitavan 38 107 abitantas ed abitants da naziunalitad estra en il chantun, 725 dapli che l'onn precedent. Entant ch'il dumber da persunas cun naziunalitad portugaisa e serba è sa reducì levamain da las diesch gruppas da persunas estras las pli grondas, è s'augmentà il dumber da burgaisas e burgais tudestgs e talians che vivan en il Grischun. 369 persunas che vivan en il chantun han acquistà il dretg da burgais svizzer l'onn passà.
Ils detagls davart la populaziun e davart ils svilups demografics da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'Uffizi per economia e turissem (guardar Statistik und Register).
Infurmaziuns:
Luzius Stricker, manader Statistica e registers, Uffizi per economia e turissem, tel. 081 257 23 74, e-mail Luzius.Stricker@awt.gr.ch
Responsabladad: Uffizi per economia e turissem