Navigation

Inhaltsbereich

  • Erste Mitteilung
  • Neuen Beitrag einfügen

L'Uffizi da vischnancas ha puspè envidà a la dieta da vischnancas dad oz suentermezdi en l'Arena grischuna a Cazas. Passa 200 represchentantas e represchentants da las autoritads da stgars 80 vischnancas grischunas sa participeschan a l'occurrenza. Tegnair in referat tegnan tranter auter il president da la Regenza Mario Cavigelli, il cusseglier guvernativ Marcus Caduff sco er l'anteriura cussegliera naziunala Vreni Müller-Hemmi.

Mintga dus onns organisescha l'Uffizi da vischnancas (UV) l'uschenumnada dieta da vischnancas. Tenor l'experientscha chatta la cumbinaziun tranter infurmaziuns e barat d'ideas grond interess. Circa 200 persunas, tuttas commembras d'autoritads communalas, na vulan betg manchentar oz la tschintgavla dieta da vischnancas en l'Arena a Cazas. Il UV preschenta sco ospitant differents puncts centrals da sias activitads. Il manader da l'uffizi Thomas Kollegger dat ina invista da la surveglianza da las finanzas e da la gulivaziun da finanzas ed illustrescha intginas dumondas giuridicas actualas che pertutgan las vischnancas.

Temas multifars da l'administraziun chantunala
Marcus Caduff, il schef dal Departament d'economia publica e fatgs socials, referescha davart dumondas economicas e socialas sco er pertutgant la planisaziun dal territori. Plinavant vegnan tegnids differents referats specifics. Il president da la Regenza e schef dal Departament d'infrastructura, energia e mobilitad Mario Cavigelli infurmescha davart la strategia chantunala concernent la forza idraulica. Ses collavuratur Orlando Nigg referescha davart las acquisiziuns publicas. Tras Thierry Jeanneret, il manader da la partiziun Sport tar l'Uffizi per la scola populara ed il sport, vegnan las autoritads sensibilisadas per la tematica da la «Coordinaziun dal sport en las vischnancas grischunas».

Possessuras e possessurs d'abitaziuns secundaras sco punct final captivant
Il punct final fa l'anteriura cussegliera naziunala Vreni Müller-Hemmi cun il tema «Chapir possessur(a)s d'abitaziuns secundaras en il Grischun sco potenzial». Avant intgins mais ha la presidenta da la Cuminanza d'interess Tujetsch procurà per lingias grossas en las medias grischunas. Sco presidenta da questa uniun, che defenda ils interess da las possessuras e dals possessurs d'abitaziuns secundaras en la vischnanca da Tujetsch, enconuscha dunna Vreni Müller-Hemmi ils basegns specifics. Che las vischnancas n'han betg adina las medemas ideas concernent las pretensiuns da las possessuras e dals possessurs d'abitaziuns secundaras envers las instituziuns publicas, è evident ed ha chaschunà discussiuns gia differentas giadas. Ins po spetgar cun mirveglias il referat e la discussiun che suonda.

Cusseglier guvernativ Christian Rathgeb, il schef dal Departament da finanzas e vischnancas, sto desister a curta vista da la participaziun. Ses rapport davart fatschentas currentas e futuras dal Departament da finanzas e vischnancas vegn preschentà en furma digitala.

Fotografias agiuntadas:

Foto Gemeindetagung 2021 1

 

Foto Gemeindetagung 2021 2

Infurmaziuns:

- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch



Responsabladad: Departament da finanzas e vischnancas

Neuer Artikel