Navigation

Inhaltsbereich

  • Erste Mitteilung
  • Neuen Beitrag einfügen
La Regenza ha dà glisch verda per ina soluziun transitorica dals posts da la polizia en Engiadin'Ota. Ultra da quai ha ella deliberà ina contribuziun chantunala per ina puntetta per velos e per pedunas e peduns sur il Rain posteriur.

Soluziun transitorica per ils posts da la Polizia chantunala en Engiadin'Ota

Sco soluziun transitorica prenda il chantun Grischun en locaziun per la Polizia chantunala localitads en la surbajegiada «Porta Samedan», fin ch'il center administrativ regiunal a la staziun da Samedan stat a disposiziun. Pia vegnan vendids u renatiralisads ils objects da la basa da la Polizia chantunala e da la Polizia da traffic a Silvaplauna e dal post da polizia en la Chesa Piz Ot, che daventan obsolets, sco er las ulteriuras surfatschas da deposit e plazzas da parcar a Samedan.

Resguardond ina procedura giuridica e la decisiun politica necessaria dal suveran grischun èsi realistic ch'il center administrativ a Samedan possia vegnir retratg il pli baud l'onn 2030. Quest grond retard per retrair il center administrativ a Samedan ha consequenzas considerablas per la Polizia chantunala. Senza realisar ina soluziun transitorica fiss il chantun sfurzà da renovar cun investiziuns considerablas ils indrizs manaschials e tecnics, ch'èn per part fitg antiquads en ils posts existents.

La Polizia chantunala po retrair las localitads en la surbajegiada «Porta Samedan» probablamain il 1. da mars 2022. Cun remplazzar ils lieus vegls tras in object da locaziun modern vegnan meglieradas cleramain l'effizienza manaschiala e l'administraziun. Las collavuraturas ed ils collavuraturs da la basa da polizia Engiadin'Ota-Bregaglia survegnan cundiziuns optimalas per furnir las prestaziuns en moda efficazia. La finamira resta però quella da realisar uschè svelt sco pussaivel il center administrativ regiunal a la staziun da Samedan, en il qual vegnan unids tranter auter tut ils posts restants da la Polizia chantunala en l'Engiadin'Ota – e pia er quel da la «Porta Samedan».

Foto Porta Samedan

©Pfister Immobiglias SA

Sco soluziun transitorica prenda il chantun Grischun en locaziun per la Polizia chantunala localitads en la surbajegiada «Porta Samedan», fin ch'il center administrativ regiunal a la staziun da Samedan stat a disposiziun.

Contribuziun chantunala per ina puntetta per velos e per pedunas e peduns sur il Rain posteriur

La Regenza ha approvà ina dumonda da la vischnanca da Panaduz da conceder ina contribuziun per construir ina puntetta per velos e per pedunas e peduns sur il Rain posteriur. Als custs totals approximativs da circa 1,42 milliuns francs sa participescha il chantun cun ina contribuziun da maximalmain 463 000 francs.

Pedunas e peduns sco er ciclistas e ciclists n'han actualmain nagina pussaivladad da traversar il Rain posteriur sin ils var 10 kilometers tranter Rehanau e Giuvaulta. Per quest motiv intenziuneschan las vischnancas da Panaduz e da Domat da pender ina puntetta per il traffic da peduns e da velos vi da la punt da la via naziunala N13. Questa punt traversa il Rain posteriur sin l'autezza da Panaduz curt avant il tunnel Isla Bella (Nuin fin Plazzas). Gia tar las lavurs da construcziun da la punt l'onn 1979 èn vegnidas prendidas mesiras tecnicas per ina tala puntetta. Las lavurs da construcziun pon vegnir realisadas directamain suenter las lavurs da sanaziun da la punt ch'èn previsas ils onns 2022 e 2023.

Visualisierung Steg Hinterrhein

La Regenza ha approvà ina dumonda da la vischnanca da Panaduz da conceder ina contribuziun per construir ina puntetta per velos e per pedunas e peduns sur il Rain posteriur. Als custs totals approximativs da circa 1,42 milliuns francs sa participescha il chantun cun ina contribuziun da maximalmain 463 000 francs.

Neuer Artikel
Responsabladad: Regenza