Sin invit da la Regenza grischuna ha la Regenza dal chantun Appenzell Dadora visità il chantun Grischun. Gia ier suentermezdi han las duas delegaziuns approfundà lur bunas relaziuns cun in barat d'ideas en in'atmosfera lucca.

Il president da la Regenza grischuna Mario Cavigelli ed il chancelier Daniel Spadin han dà il bainvegni als giasts ch'èn arrivads ier suentermezdi a la staziun da Cuira. Ils cussegliers guvernativs dal chantun Appenzell Dadora accumpagnads da lur partenarias èn vegnids beneventads cordialmain. Alura è la delegaziun cun il president Dölf Biasotto, cun ils cussegliers guvernativs Yves Noël Balmer, Alfred Stricker, Paul Signer e Hansueli Reutegger sco er cun il chancelier Roger Nobs vegnida retschavida en la sala da la Regenza. Suenter ina spassegiada tras la citad veglia da Cuira fin tar la catedrala e suenter avair visità il Museum dal stgazi da la catedrala è la saira vegnida cumplettada cun ina tschaina patgifica.

Cun la viafier tar Alois Carigiet e cun la charrotscha a la Ruinaulta
Il di dad oz ha cumenzà cun in viadi en la Viafier retica fin a Trun e cun in ensolver cuminaivel. Ensemen cun Johannes Flury, il president da la Lia Rumantscha, han las duas delegaziuns da las Regenzas visità suenter la «Cuort Ligia Grischa» cun il Museum sursilvan che mussa ovras originalas da l'artist renumà da Trun Alois Carigiet. En il decurs dal suentermezdi ha il viadi cuntinuà cun il bus fin a Flem e cun la charrotscha fin a Conn. Davent da là pon ins chaminar sin la plattafurma panoramica «Il Spir» che permetta ina vista unica da 180 grads sin la Ruinaulta.

Fotografia agiuntada:

Il president da la Regenza Mario Cavigelli beneventa il Landammann Dölf Biasotto ed ils ulteriurs giasts davant la Chasa grischa a Cuira

Infurmaziuns:

president da la Regenza dr. Mario Cavigelli, schef dal Departament d'infrastructura, energia e mobilitad, e-mail Mario.Cavigelli@diem.gr.ch

Responsabladad: Chanzlia chantunala