En la Chasa dals chantuns a Berna è l'exposiziun ambulanta «Rumantsch è…» vegnida averta cun in act festiv. Ella sensibilisescha per il rumantsch, gida a colliar ed envida las visitadras ed ils visitaders sezzas e sezs da «semnar lingua». Fin mez december vegn l'exposiziun mussada en la Chasa dals chantuns. Suenter va ella sin viadi.
L'exposiziun ambulanta «Rumantsch è…» metta accents per la diversitad linguistica en Svizra. Ella sensibilisescha per il rumantsch en las quatter linguas naziunalas, gida a colliar las Rumantschas ed ils Rumantschs ed envida las visitadras ed ils visitaders sezzas e sezs da «semnar lingua». Cun cusseglier guvernativ Christian Rathgeb presidiescha per l'emprima giada in Grischun la Conferenza da las regenzas chantunalas (CdC), quai è il motiv per l'exposiziun ambulanta.
Avertura festiva
Ils var 80 giasts en la Chasa dals chantuns èn vegnids beneventads dals cussegliers guvernativs Christian Rathgeb e Jon Domenic Parolini sco er da Johannes Flury, il president da la Lia Rumantscha. Sa participada a l'occurrenza è er la presidenta dal Cussegl grond Aita Zanetti. Pascal Gamboni (musica) e Robert Buchli (cabaret) han accumpagnà la sairada. Gia da mezdi han las cusseglieras guvernativas ed ils cussegliers guvernativs che represchentan lur chantuns en l'Assamblea generala da la CdC, visità l'exposiziun.
«Grazia al rumantsch è noss pajais pli multifar, pli interessant e pli colurà – questa missiva vulain nus purtar or en Svizra ed intimar d'agir», ha il cusseglier guvernativ Christian Rathgeb ditg a chaschun da l'avertura. Cusseglier guvernativ Jon Domenic Parolini ha agiuntà: «L'exposiziun ambulanta mussa il grond engaschament dal Grischun per il rumantsch.» «In terz da las Rumantschas e dals Rumantschs viva oz ordaifer il Grischun. Da cuntanscher ellas ed els, è in grond giavisch», ha Johannes Flury da sia vart accentuà.
Davent da la Chasa dals chantuns tras la Svizra
Fin mez december vegn l'exposiziun ambulanta mussada en la Chasa dals chantuns. Qua vegnan millis represchentantas e represchentants da la Confederaziun, dals chantuns, da las vischnancas e d'ulteriuras instituziuns da tut la Svizra a vesair l'exposiziun ambulanta a l'ur da sesidas u da scuntradas ed uschia ad emprender insatge davart il rumantsch.
Damai che tut las persunas en quest pajais contribueschan a la diversitad linguistica, vegn l'exposiziun ad ir sin viadi ed ad esser accessibla publicamain durant ils proxims onns. Ella vegn er a sa fermar en il Grischun. Ils lieus d'exposiziun n'èn betg anc fixads. Persunas interessadas pon dentant gia ussa survegnir ina impressiun da l'exposiziun ambulanta sin www.rumantsch-e.ch.
L'exposiziun ambulanta «Rumantsch è…» è in project dal chantun Grischun. Ella è vegnida creada en collavuraziun cun la Lia Rumantscha, cun la Promoziun da la cultura dal Grischun e cun la CdC. Il mars aveva la Regenza concludì da la realisar cun ina contribuziun or da la finanziaziun speziala da la lottaria naziunala.
Fotografia agiuntada:
Infurmaziuns:
– cusseglier guvernativ dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
– dr. Johannes Flury, president da la Lia Rumantscha, tel. +41 79 768 28 76, e-mail johannes.flury@rumantsch.ch
Responsabladad: Departament da finanzas e vischnancas