Navigation

Inhaltsbereich

  • Erste Mitteilung
  • Neuen Beitrag einfügen

Var 15 000 Grischunas e Grischuns assistan, accumpognan u tgiran lur confamigliars. Ellas ed els n'èn betg mo emoziunalmain pitgas impurtantas per las persunas pertutgadas, mabain distgargian er considerablamain il sectur da sanadad en reguard finanzial e persunal. Per renconuscher questa contribuziun sociala vegn ils 30 d'october statuì sco «Di interchantunal da las persunas che assistan lur confamigliars».

Ils confamigliars èn ina pitga impurtanta per las persunas ch'èn avisadas sin accumpagnament e sin distgargia. Cun prestar nundumbraivlas uras cun lavurs d'assistenza e da tgira èn els ina part impurtanta dal provediment da la sanadad. Els sustegnan ils confamigliars malsauns psichicamain e socialmain, als gidan en il tegnairchasa, fan cumpras ed organiseschan transports. Quest sustegn è indispensabel, per ch'ina persuna malsauna possia restar uschè ditg sco pussaivel a chasa. Perquai ch'ils umans vegnan pli e pli vegls, èsi impurtant da garantir l'assistenza da persunas che basegnan tgira. Quai è ina gronda sfida per il provediment da la sanadad.

Sin l'agenda politica
Il tema survegn tant tar la Confederaziun sco er en il chantun Grischun pli e pli paisa e stat sin l'agenda politica. Il 1. da schaner 2021 è ida en vigur la nova Lescha federala davart la meglieraziun da la cumpatibilitad da l'activitad da gudogn cun la tgira da confamigliars. Grazia ad in congedi pajà pussibilitescha la nova lescha, che las persunas che assistan lur confamigliars pon coordinar meglier ina cun l'autra l'activitad professiunala e la tgira. Concret han quellas persunas da bun fin trais dis per la tgira d'in confamigliar suenter in accident u pervia d'ina malsogna. Geniturs d'uffants grevamain malsauns u ch'han gì in accident survegnan in congedi da fin 14 emnas. La rolla impurtanta da las persunas che assistan lur confamigliars vegn uschia accentuada. Sin plaun chantunal ha il Departament da giustia, segirezza e sanadad incumbensà l'Uffizi da sanadad da prender per mauns l'elavuraziun d'in plan d'acziun per sustegnair e per distgargiar las persunas che tgiran lur confamigliars.

Ballantscha tranter las resursas e las chargias
Il management da sasez è impurtant per mantegnair ina buna ballantscha tranter las resursas e las chargias. Ils confamigliars che assistan e che tgiran pon vegnir sustegnids cun differentas scolaziuns e furmaziuns supplementaras. Qua datti gia numerus exempels en chaussa. Ina selecziun da scolaziuns e da curs sco er diversas infurmaziuns davart il sustegn finanzial e davart purschidas da cussegliaziun e da sustegn chattais Vus sin la pagina d'internet dal chantun www.angehoerige-betreuen.gr.ch.

Infurmaziuns:

Rudolf Leuthold, manader da l'Uffizi da sanadad, tel. +41 81 257 26 41, e‑mail Rudolf.Leuthold@san.gr.ch

 

Responsabladad: Uffizi da sanadad

Neuer Artikel