Perquai che l'aura da chatscha è stada fitg chauda e cunquai ch'i n'ha betg dà grondas navaglias, è la preda da chatscha auta quest onn bain main buna che l'onn passà, sa chatta dentant sin il nivel dals onns 2018 e 2019. Las chatschadras ed ils chatschaders han prestà in grond engaschament fin ussa. Durant la chatscha dal november e dal december ston anc vegnir sajettadas vatgas-tschierv e chauras-chavriel en differentas regiuns. Quai è impurtant per regular las populaziuns.

Pervia dal grond dumber da selvaschina d'ungla e pervia da sia influenza regiunalmain fitg gronda sin il guaud è il squitsch da chatscha sin tschiervs e sin chavriels vegnì augmentà danovamain fitg ferm quest onn – en singulas regiuns er sin ils chamutschs e sin ils portgs selvadis. En tut las regiuns cun gronds conflicts tranter il guaud e la selvaschina è vegnida augmentada la quota d'animals feminins en il plan da prelevaziun. Il plan è ademplì, cur che almain 3177 animals feminins èn vegnids sajettads. En il rom da la planisaziun da la chatscha auta (CA) da quest onn è er vegnida resguardada la reducziun fitg ferma tar la populaziun da chavriels e da chamutschs en Surselva, quai cun restricziuns da chatscha correspundentas.

Resultats da l'emprima part da la chatscha grischuna 2021

Ina lavur pretensiusa spetga
Per che l'incarica da la chatscha possia vegnir ademplida, ston vegnir sajettadas anc 2469 vatgas-tschierv cun lur vadels durant la chatscha dal november e dal december 2021. Er las populaziuns da chavriels ston vegnir reguladas vinavant. Perquai ston vegnir sajettads en differentas regiuns anc 282 chauras-chavriel e chavriels giuvens ch'èn naschids quest onn. Perquai ch’il decurs da la chatscha dal november e dal december dependa er marcantamain da la purschida existenta da tschiervs e da chavriels e da las relaziuns da l'aura, èsi ina incumbensa pretensiusa d'ademplir ils plans da prelevaziun da quest onn.

La collavuraziun è decisiva
In guaud da protecziun saun e bain structurà garantescha segirezza duraivla a la populaziun grischuna. In factur decisiv en quest connex è er la regiuvinaziun natirala dal guaud. La reducziun da las populaziuns da selvaschina d'ungla ed uschia er da l'influenza da la selvaschina sin la regiuvinaziun dal guaud è ina contribuziun impurtanta en chaussa. Medemamain indispensabel èsi che tut las parts participadas collavurian ina cun l'autra en moda constructiva e cun respect. En quest connex èsi impurtant che las proprietarias da guaud sustegnian la lavur da las chatschadras e dals chatschaders, er en cas da cundiziuns difficilas. Mo uschia pon vegnir cuntanschidas las finamiras cuminaivlas.

Agiuntas:

- plan da la chatscha d'atun (chatscha speziala) da tschiervs 2021

- plan da la chatscha d'atun (chatscha speziala) da chavriels 2021

- tabella dals resultats da la chatscha auta 2021

Infurmaziuns:

- Adrian Arquint, manader da l'Uffizi da chatscha e pestga dal Grischun, tel. +41 81 257 38 92, e-mail Adrian.Arquint@ajf.gr.ch

- Urban Maissen, selvicultur chantunal, Uffizi da guaud e privels da la natira, tel. +41 79 475 52 11, e-mail Urban.Maissen@awn.gr.ch (cuntanschibel a partir da las 13.00)

Responsabladad: Uffizi da chatscha e pestga