La Regenza vul cuntinuar cun la promoziun da la scolaziun da medias e medis da chasa. Per garantir il provediment medical da basa paja il chantun dapi intgins onns contribuziuns als projects «Curriculum da medias e medis da chasa» e «Capricorn». Cun activitads correspundentas en in manaschi da praticum inclusiv ambulatori d'ospital vulan tuts dus projects gudagnar medias e medis d'assistenza per la medischina da chasa ed uschia almain reducir la mancanza da medias e medis da chasa.
Ils dus projects «Curriculum da medias e medis da chasa» e «Capricorn» duain ussa vegnir extendids. Tenor il concept da l'Ospital chantunal dal Grischun dals 18 da zercladur 2021 vegni prendì en mira d'augmentar il dumber da las plazzas da curriculum che vegnan actualmain cofinanziadas dal chantun da tschintg (= 1 absolvent/-a per onn) en 5 onns a diesch plazzas da curriculum en 2 onns e mez (= 4 absolvent/-as per onn). Il dumber da plazzas d'assistenza da pratica dal project «Capricorn» vegn augmentà da fin ussa 6 plazzas ad 8 plazzas. Las plazzas vegnan integradas en l'organisaziun dal curriculum da medias e medis da chasa.
La Regenza ha concludì ch'il chantun surpiglia 75 pertschient dals custs da salari da las absolventas e dals absolvents dal curriculum da medias e medis da chasa sco er da las plazzas d'assistenza da pratica dal program «Capricorn» e 100 pertschient dals custs da salari da la direcziun dal curriculum da medias e medis da chasa cun in'occupaziun da 20 pertschient. Ultra da quai conceda il chantun a l'Ospital chantunal dal Grischun maximalmain las suandantas contribuziuns per finanziar las plazzas en il rom dal nov curriculum da medias e medis da chasa (inclusiv Capricorn): 1,3 milliuns  francs per l'onn 2022, 1,4 milliuns francs per l'onn 2023 ed 1,6 milliuns francs a partir da l'onn 2024. Questas contribuziuns vegnan deliberadas cun la resalva ch'il Cussegl grond approveschia il preventiv.

A partir dal cumenzament da l'onn da scola 2022/23 po la Scola auta spezialisada dal Grischun (SASGR) porscher il studi «Master of Science SASGR in User Experience Design and Data Visualization». Il studi da master dat a las studentas ed als students da la SASGR en ils studis da bachelor «Digital Business Management», «Information Science», «Computational and Data Science», «Mobile Robotics», «Multimedia Production» e «Photonics» la pussaivladad d'approfundar las enconuschientschas gia acquistadas. Plinavant permetta el a tut las absolventas ed ils absolvents d'ina scola auta en Svizra d'extender a la SASGR – sco persunas che derivan d'ina autra professiun – las enconuschientschas en il sectur da la transfurmaziun digitala.
Grazia a l'introducziun da quest studi vegnan promovidas duraivlamain las finamiras da la Regenza «da rinforzar il Grischun sco lieu da furmaziun e da perscrutaziun» e «da sustegnair la transfurmaziun digitala en il chantun Grischun» dal Program da la Regenza 2021–2024.

©Keyvisual FHGR

La Regenza ha approvà la revisiun parziala da la planisaziun locala, che la vischnanca da La Punt Chamues-ch aveva concludì ils 23 da fanadur 2020. Tras questa revisiun da la planisaziun locala duain vegnir stgaffidas las premissas per pudair realisar il project «InnHub» en il territori d'abitar e da mastergn Truochs/La Resgia. Il project «InnHub» prevesa pussaivladads da lavur, da seminari e da sport e cuntegna ina fatschenta da commerzi en detagl per products locals, ina cafetaria, abitaziuns explotadas sco er ina garascha sutterrana cun circa 100 parcadis. Cun il project «InnHub» duai l'Engiadina sa sviluppar sco lieu da retratga, da colliaziun e d'inspiraziun en Svizra. Ultra dad esser in lieu d'abitar e da lavur per persunas indigenas duai l'Engiadina daventar en l'avegnir er in lieu da lavur temporar per persunas d'ordaifer ch'èn activas sco lavurantas u lavurants da savida.

©Andrea Badrutt