La Cumissiun dal Cussegl grond per economia e taxas (CET) recumonda al Cussegl grond da sa participar a la Cunvegna interchantunala revedida davart las acquisiziuns publicas (CIAP). Ella beneventa l'armonisaziun che vegn prendida en mira cun la participaziun sin tut ils trais plauns statals sco er il rinforzament da la concurrenza da la qualitad.
Sut la direcziun da la presidenta da la cumissiun Carmelia Maissen ed en preschientscha dal president da la Regenza Mario Cavigelli, schef dal Departament d'infrastructura, energia e mobilitad, ha la CET discutà davart ils avantatgs e davart ils effects da la nova cunvegna e decidì unanimamain da recumandar al Cussegl grond da sa participar sco er da relaschar ina lescha introductiva chantunala. La fatschenta vegn tractandada en la sessiun da december 2021 dal Cussegl grond.
Armonisaziun e midada da la cultura da surdada
Ils 15 da november 2019 ha la Conferenza svizra dals directurs da construcziun, da planisaziun e da protecziun da l'ambient (CCPA) deliberà unanimamain la CIAP revedida. Cun sia realisaziun duain vegnir unifitgadas las prescripziuns en il dretg chantunal d'acquisiziun che vegn applitgà en ils chantuns, en las citads ed en las vischnancas. Ultra da quai duai vegnir cuntanschida ina vasta armonisaziun cun il dretg da surdada da la Confederaziun, ch'è medemamain vegnì revedì. Plinavant vegni intenziunà da flexibilisar e da digitalisar ils process da surdada (plattafurma per surdadas simap.ch) e da reducir la lavur administrativa per las offerentas ed ils offerents sco er per ils posts d'acquisiziun. Vegnir etablida duai er ina nova cultura da surdada per las acquisiziuns publicas. Questa cultura metta en il center la concurrenza da la qualitad empè da la concurrenza dal pretsch, rinforza la persistenza e promova l'innovaziun. La cumissiun beneventa la midada da la cultura da surdada, che vegn prendida en mira. Da questa cultura profitan er las enconuschientschas ed ils standards da qualitad da las interpresas grischunas. Medemamain sustegna ella la realisaziun da las recumandaziuns da la CPI Cartel da construcziun en la lescha introductiva chantunala, cun excorporar il Post d'annunzia per incunvegnientschas or da l'administraziun e cun manar quel sco post independent extern.
Incaricas da prestaziuns da servetsch a l'economia indigena
Ultra da quai ha la CET tractà il rapport da la Regenza davart las incaricas da las prestaziuns da servetsch dal chantun che vegnan surdadas en la procedura directa ed en la procedura d'invit. La cumissiun è vegnida a la conclusiun che l'economia indigena vegn – tenor il rapport – da princip resguardada bain tar questas incaricas da prestaziuns da servetsch dal chantun. Plinavant va ella d'accord cun la valitaziun da la Regenza ch'il chantun dispona gia oz d'ina organisaziun professiunala da las acquisiziuns e d'ina rapportaziun adattada en la cumparegliaziun interchantunala. La CET ha dentant er constatà che bleras incaricas en tematicas specificas chantunalas ston vegnir surdadas a furniturs da prestaziuns ordaifer il chantun, perquai che las enconuschientschas specificas correspundentas mancan en il Grischun. Perquai propona la cumissiun al Cussegl grond da far ina decleraziun che ha la finamira da promover stentas per sviluppar questas cumpetenzas.
Infurmaziuns:
presidenta da la cumissiun dr. Carmelia Maissen, tel. +41 79 713 90 27 (cuntanschibla per telefon tranter las 14.00 e las 16.00)
Responsabladad: Cumissiun per economia e taxas