Il volumen da tests en ils manaschis ed en las scolas dal Grischun è s'augmentà fermamain las ultimas emnas. Per consequenza na pon las provas betg vegnir evaluadas a temp util. Perquai prenda il chantun mesiras immediatas per pudair cuntinuar cun il program grischun da tests.
Ils tests en ils manaschis ed en las scolas èn acceptads en il Grischun uschè bain, ch'els arrivan als cunfins da lur capacitads. Mintga emna vegnan actualmain analisads passa 40 000 tests en il Grischun. Ils labors èn surchargiads. Per consequenza na pon las provas betg vegnir evaluadas a temp util. Per pudair cuntinuar cun ils tests repetitivs ston las quantitads da tests vegnir adattadas a las capacitads dals labors. Perquai ha il chantun Grischun decretà mesiras immediatas.
Mesiras tar ils tests en las scolas:
- Ad interim vegni testà ina giada per emna; las capacitads dals labors permettan da testar duas giadas per emna mo en cas excepziunals e mo en cunvegnientscha cun la direcziun dal project dals tests en las scolas.
- Uffants e persunas creschidas cun sintoms èn supplitgads da restar a chasa e da sa laschar testar tar in post da test uffizial (center da test, media u medi da chasa, apoteca) e betg en il rom dals tests en las scolas.
- Sche almain quatter persunas d'ina classa da scola han in test positiv, sto l'entira classa ir per 10 dis en quarantina e l'instrucziun ha lieu a distanza.
Adattaziuns dals tests en ils manaschis:
- Ad interim po ina persuna far maximalmain trais tests per emna.
- Persunas (vaccinadas e betg vaccinadas) cun sintoms èn supplitgadas da sa laschar testar tar in post da test uffizial (center da test, media u medi da chasa, apoteca) e betg en il rom dals tests en ils manaschis.
- Persunas vaccinadas na duain da princip betg sa laschar testar regularmain en il rom dals tests en ils manaschis e far maximalmain in test per emna.
- Las persunas da contact da persunas infectadas duain far mo pli mintga segund di in test. Tgi che dovra en cas excepziunals ina frequenza da tests pli auta, duai far – ils dis tranteren – in test svelt tar in center da test uffizial. En cas da sintoms pon ins sa laschar testar gratuitamain tar mintga post da test.
- Ils certificats COVID sin basa dals tests en ils manaschis restan previsiblamain gratuits fin la fin da la stagiun d'enviern. I na po dentant betg vegnir garantì ch'ils certificats COVID gratuits sin basa dals tests en ils manaschis vegnian consegnads entaifer 48 uras.
A persunas che dovran urgentamain in certificat vegni perquai recumandà da sa render tar in post da test (center da test, media u medi da chasa, apoteca).
L'Uffizi da sanadad supplitgescha per sustegn
Ils tests repetitivs mussan effect. Grazia als tests regulars en las scolas ed en ils manaschis reusseschi d'identifitgar e d'interrumper a temp las chadainas d'infecziun. Questas mesiras gidan a regular en moda persistenta il svilup da la pandemia en il Grischun. Per pudair cuntinuar cun ils tests repetitivs ston las quantitads da tests pudair vegnir adattadas a las capacitads dals labors. Sch'i na reussescha betg da reducir la quantitad da tests cun agid da las mesiras menziunadas qua survart, vegnan ins a stuair examinar ulteriuras mesiras (p.ex. la sistida dals certificats gratuits sin basa dals tests). La finamira da las mesiras è quella da cuntinuar cun ils programs da tests.
Cun restrenscher ils contacts persunals, cun purtar ina mascrina, cun dar regularmain aria als locals e cun lavar ils mauns pon mintgina e mintgin gidar a franar l'unda d'infecziun actuala.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (mo per collavuraturas e collavuraturs da las medias)
Responsabladad: Stab directiv chantunal dal Grischun