Sco gremi consultativ da la Regenza vul il Cussegl turistic dal Grischun dar ulteriurs impuls a l'economia turistica dal Grischun. Ina discussiun d’experts cun federaziuns da branscha e cun instituziuns da furmaziun dal Grischun davart ils temas «Fugia dal chapital uman» e «Tecnologia en il turissem» ha puspè mussà, quant grondas e quant acutas che las sfidas èn areguard la mancanza da persunal spezialisà en il turissem. Ussa duain mesiras cuminaivlas vegnir evaluadas e concretisadas.

Dapi la fin da l'onn 2020 s’occupa il Cussegl turistic dal Grischun dal tema da l'emigraziun da las forzas da lavur qualifitgadas e bain scoladas da l'economia turistica dal Grischun («Fugia dal chapital uman») ed uschia er dal svilup tecnologic respectiv ch'è necessari en il sectur turistic («Tecnologia en il turissem»). Cun l'urbanisaziun dals ultims onns, ch'è vegnida promovida spezialmain da la digitalisaziun, è s’intensivada la fugia dal chapital uman davent da las regiuns marcadas fermamain dal turissem. A medem temp è s'augmentada l'impurtanza da las cumpetenzas e da las soluziuns digitalas per la cumpetitivitad da las prestaziuns turisticas. La fugia dal chapital uman davent dal turissem dastgass – medemamain sco la digitalisaziun – s'intensivar durant il temp suenter COVID.

Far frunt proactivamain a las sfidas actualas
L'Universitad da Son Gagl (IMP–HSG) e l'Universitad da Berna (CRED-T) han elavurà dus studis cumplementars davart ils temas «fugia dal chapital uman» e «tecnologia en il turissem». Las sfidas actualas èn: la mancanza creschenta da persunal spezialisà ed il nivel da scolaziun pli aut, ina gronda fluctuaziun da las absolventas e dals absolvents da scolaziuns turisticas sco er ina flaivla francaziun da la scolaziun e da la furmaziun supplementara en las interpresas. A questas sfidas duai vegnir fatg frunt cun mesiras adattadas. Ina vasta basa da pussaivladads da scolaziun e da furmaziun supplementara per la branscha turistica è avant maun. Er en il sectur da la «tecnologia turistica» datti potenzial da svilup. Però er en la concurrenza cun auters lieus, ils quals investeschan gia activamain en il tema, dovri stentas supplementaras.

Discussiun d’experts revelescha grondas sfidas
Sin invitaziun dal Cussegl turistic dal Grischun han federaziuns da branscha ed instituziuns da furmaziun dal Grischun discutà ils resultats dals dus studis e formulà eventuals pass per als concretisar. La discussiun ha pudì stgaffir ina chapientscha cuminaivla per las sfidas che resultan per il chantun Grischun e dar ina survista da las iniziativas ch'existan. Ils proxim mais duain vegnir evaluadas mesiras ch'èn destinadas a tut las branschas, per augmentar l'attractivitad dal Grischun sco lieu da lavur.

Tendenzas turisticas en il focus: «Alloschament flexibel» e «lavurar e relaxar»
Ulteriurs temas, dals quals il Cussegl turistic dal Grischun s'occupa il mument, èn las furmas d'alloschament semistaziunaras sco er temporaras. La purschida da talas furmas d'alloschament vegn engrondida er en il Grischun e scuntra – pertutgant la dumonda – sin ina tendenza turistica correspundenta. Ensemen cun la Scola auta spezialisada dal Grischun vegn elavurada ina basa cun il titel da lavur «Alloschament flexibel». Questa basa duai mussar, tge tips da talas furmas d'alloschament ch'existan gia, tge sfidas ch'èn colliadas cun quai e co che questa tendenza vegn a sa sviluppar vinavant en il futur. Actualmain è en curs ina vasta enquista tar ils purschiders, tar las vischnancas e tar las organisaziuns turisticas.

Las consequenzas da la pandemia dal coronavirus sco er la digitalisaziun han promovì novas furmas da lavurar mobilas e la glieud nizzegia pli e pli lieus da lavur flexibels. Lavur (Work) e vacanzas (Vacation) alterneschan – omadus pols vegnan cumbinads in cun l'auter. Las regiuns ruralas e pia er il Grischun pon profitar da quest svilup. Sut il titel «Lavurar e relaxar» vul il Cussegl turistic dal Grischun sclerir, tge mesiras che ston vegnir prendidas en il Grischun per promover novas furmas da lavur e per rinforzar las interpresas turisticas.

La primavaira 2022 vegnan ad esser avant maun ils resultats dals dus studis.

Cussegl turistic dal Grischun
Entaifer il Program da turissem dal Grischun 2014–2023 ademplescha il Cussegl turistic dal Grischun ina funcziun consultativa envers la Regenza grischuna ed envers il Departament d'economia publica e fatgs socials. L'incumbensa dal Cussegl turistic è quella da sviluppar vinavant il sistem turistic general dal turissem grischun e da dar impuls cun cleras finamiras. El po elavurar las basas davart tematicas relevantas per il turissem, reflectar criticamain quellas ed inspirar uschia la branscha turistica en il Grischun.

Las dumondas per in sustegn finanzial da projects innovativs e da projects da cooperaziun pon vegnir inoltradas er vinavant a l'Uffizi per economia e turissem. En il Program da turissem dal Grischun 2014–2023 che vegn finanzià cun meds da la Nova politica regiunala da la Confederaziun, èn anc avant maun meds da promoziun per l'entira durada dal program.

Fotografia agiuntada:

Represchentantas e represchentants da federaziuns da branscha e d'instituziuns da furmaziun discutan – sin invitaziun dal Cussegl turistic dal Grischun – davart las sfidas da la mancanza da persunal spezialisà.

Infurmaziuns:

Responsabladad: Secretariat Cussegl turistic dal Grischun, c/o Uffizi per economia e turissem