L'ultima giada èn las vopnas da las vischnancas grischunas e la vopna chantunala vegnidas publitgadas l'onn 1982 en il Cudesch da vopnas dal chantun Grischun. En il fratemp hai dà bleras midadas en quai che pertutga il dumber da las vischnancas ed i èn vegnidas creadas intginas novas vopnas. En collavuraziun cun la Cumissiun eraldica ha la Chanzlia chantunala ussa endrizzà in register digital da las vopnas da dretg public valaivlas.
En sia furma actuala exista la vopna chantunala dapi l'onn 1932, entant che las vopnas communalas èn vegnidas definidas per l'emprima giada liantamain l'onn 1953 en il Cudesch da vopnas dal chantun Grischun. Il Cudesch da vopnas è vegnì actualisà l'onn 1982, ma dapi lura hai dà midadas considerablas en la cuntrada da vopnas dal chantun. Ils circuls, che avevan medemamain vopnas, n'existan betg pli dapi il 1. da schaner 2016; pervia da quai han lur vopnas pers lur impurtanza oriunda. Ultra da quai han numerusas fusiuns da vischnancas gì per consequenza ch'il dumber da vischnancas è sa reducì cuntinuadamain. Actualmain datti anc 101 vischnancas.
L'onn 2020 ha la Chanzlia chantunala dal Grischun concludì d'actualisar las midadas da l'effectiv da las vopnas dapi l'onn 1982. Empè d'ina ulteriura reediziun dal Cudesch da vopnas han ins decidì d'endrizzar da nov – ensemen cun la Cumissiun eraldica – in register da vopnas digital che po vegnir actualisà cuntinuadamain.
Vopnas en tschintg formats grafics digitals
DPer mintga vopna cuntegna il register la descripziun da la vopna giuridicamain lianta ed approvada da la Regenza – l'uschenumnà «blasonament» – sco er las colurs appartegnentas ch'èn relevantas per la producziun da bandieras. Ultra da quai vegnan las preschentaziuns graficas da las vopnas messas a disposiziun en tschintg formats digitals per il download. Tut las vopnas communalas èn vegnidas dissegnadas da nov cun la metoda vectografica, applitgond in standard eraldic grischun che sa basa sin ina definiziun precisa. Il standard eraldic definescha tranter auter las valurs exactas da las colurs, la furma dal scut sco er la grossezza da las lingias. La purschida digitala duai gidar a garantir la qualitad da las vopnas ch'èn en circulaziun.
Dapli infurmaziuns: Register da vopnas
Infurmaziuns:
- Reto Weiss, president da la Cumissiun eraldica, tel. +41 81 257 28 01, e-mail Reto.Weiss@sag.gr.ch
- Claudio Schäfer, collavuratur Dretgs politics e publicaziuns, Chanzlia chantunala, tel. +41 81 257 22 24, e-mail Claudio.Schaefer@staka.gr.ch (cuntanschibel a partir da las 10.00)
Responsabladad: Chanzlia chantunala