Ils 13 da favrer 2022 votescha il suveran svizzer davart mesiras en il sectur da la promoziun da las medias. Cun il project da lescha prevesan il Cussegl federal ed il parlament da rinforzar las medias localas e regiunalas. La Regenza grischuna beneventa quest project sco sustegn impurtant a favur da la diversitad regiunala e da la democrazia directa.

Ils ultims onns èn oravant tut las medias localas e regiunalas vegnidas adina dapli sut in squitsch finanzial. Ils daners da reclama van adina pli savens tar grondas plattafurmas d'internet internaziunalas; perquai èn svanidas differentas gasettas ed er las staziuns da radio e da televisiun privatas sentan che las entradas da reclama sa diminueschan. Quest svilup – uschia il tenor a chaschun da la debatta en il Parlament federal – indebleschia la rapportaziun or da las regiuns ed uschia la coesiun sociala.

La Regenza beneventa explicitamain il pachet da mesiras a favur da las medias. Ella sustegna particularmain las finamiras surordinadas da quel, da rinforzar la rapportaziun regiunala en tut las regiuns ed en tut ils linguatgs naziunals en il radio, en la televisiun, en las gasettas quotidianas ed emnilas sco era online.

Pervia da la diversitad geografica, politica e linguistic-culturala dal chantun è la diversitad da las medias da vegl ennà ina finamira centrala dal chantun Grischun. Betg sco ultim è questa diversitad er da gronda impurtanza per far funcziunar la democrazia directa sin tut ils plauns statals. Per tut quests motivs considerescha la Regenza il pachet da medias da la Confederaziun sco ina chaussa elementara per garantir la diversitad da las medias localas, regiunalas, chantunalas e naziunalas er en in ambient globalisà.

Infurmaziuns:

Cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch

Responsabladad: Departament d'educaziun, cultura e protecziun da l'ambient